California tayimtsü lendong nung nisung 3 asü

Los Angeles February 28 (Agencies) : California nung nisung aliba tesem ka nung tayimtsü tila ka tsükokba lendong nung nisung 3 tashi süogo, ta ketdangsertemi metetdaktsü.
Tayimtsü nung mena alirtemji Disneyland nung oa ‘cheerleader’ tetoktepba nung dener San Jose yimti-i meyipa aoerba liasü. Iba tayimtsüji Hombarnü Riverside tesem nung tsükokdang ki ana tashi rongtok, ta mi den rarar tekolakba Michael Moore-i osangbenertem dang ashi.
Iba tayimtsü koma ser tsükok ibaji ano mejangjateti lir.
Tayimtsü tsükoklibo Moore-i nisung pezü süogo ta ashi saka khen lir nisung asem asü ta metetdaktsüba, osangkaket nung shia lir.
Lendong nung yirur, arishi küm 40 tera agi majung tetsür ana tang mozü kidang yaridar.
Tayimtsü tsükokdang arongba ki ana nung alir shinga meyiru, ta ketdangsertemi metetdaktsüogo.
Tayimtsü, Cessna 310 ji Riverside Municipal tayimtsü anenba tesem nungi apusoli mile tesadang ka shi pilar oa tsükogo, ta tayimtsü anenba tesem nung manager Kim Ellis-i Orange County Register dang ashi.
Tayimtsüji meyipa angu aser ibaji süli tayimtsü jak alilen ser alua chiok, ta tenük kuli angur kati ashiba Orange County Register-i metetdaktsü.
Tayimtsü alua tsükokbaji menoknok anoker amai asü aser iba sülen mi long tulu adok, ta iba kiyong nung alirtemi ashi.
Ali nung alua chiokdang tayimtsüji ana aküm, ki ana meshimeshia ajasatsü, gari ka khenyongi tagitsü mali küma raksatsü aser mile tesadang kashi oset raksa agi asüng, ta osang ajanga ashi.
National Transportation Safety Board-i bushisüngdangtsü atema iba tesem nung lenmang anatsülen aliba ki 40 shi khen asoshi azüngtetdaktsüogo.