Cambodia election nung ruling party-i parliament menden ajak agi

Phnom Penh, Luroi/August 15 (Agencies): Opposition maden tashi mait election agir hopta ana sülen Cambodia sorkar nung tang yimsü tesüdak aliba teloki parliament menden ajunga kokogo, ta election committee ketdangsüri Rasemnü ashi. Hun Sen’er party-i parliamentary menden ajak (125) nung takok nguogo, ta National Election Committee odongtar, Dim Sovannarom-i osangbener dang ashi.
Iba election osang sangdongba ajanga Southeast Asia linük nung party ka dang lir ta jangja jangja sayur aser Hun Sen-i küm 33 yimsü asüba atsülangshir, saka par sorkar-i iba election timi magiba indang tasüngdangba langzütsü akok.
Iba linük nung opposition party tuluba, Cambodia National Rescue Party nung mangatettep adoka taoba küm iba party ya samaba sülen tokteper tajung melie Chiteni/July 29 nü election agi. Cambodia People’s Party-i vote million 4.8 angu ta election committee odongtari ashi aser ibaji nütsüng shilem 77 jungnüai agütsüba alitsü.
Saka iba takok ya taitsüba agi sünga lir aser mezüng vote azüngba mapang ballot 600,000 tamajung liasü aser opposition temi tanaben agishitsü akhang.
Iba election ya tim yimya nung magi, ta anülulen linüktemi aitsü aser White House-i Hun Sen’er telongzük nung züngsem kar nem tenokdangba agüja aliba atsülangshitsü, ta shia lir.
Iba election nung political party 19-i toktep saka parnok ya aika tasen liasü aser Hun Sen asoshi timtem kechia meliasü.
Arishi küm 66 tain, Hun Sen ya mezüng 1985 küm arishi küm 32 lia linük lennir asütsü shimtet aser tang tashi pai iba linük nung yimsü süa arudagi.