Cambodia nung miim aketba azü shi achiba ajanga nisung 3 asü

Phnom Penh, December 07 (Agencies): Anüdoklen aliba Kratie province, Cambodia nung miim aketba azü tuluka soa achiba sülen tajemba agi nisung asem asü aser 31 mozükidang lir, ta yangji aliba police ketdangseri Hombarnü metetdaktsü.

Iba miim aketba azü shi chir gondha ishika lir külen tambur ka den par jabaso kinungtsü aser par kidanger tetsür ka ta parnok asem Deobar anepdang asüba osang Snuol district nung police tekolakba, Kong Kimny-i ashiba Xinhua osang ajanga metetdaktsüdang parnoki ashiba agi, iba miim aketba azüji kidang soa achitsü atema tambusangi bazaar nungi alir aru.

Kimny-i, par asem asüpila sentong nung adentsü arur parnok 31 tashi anünga aliba azü shiji chir külen temang nung timtem adok, ta ashi.

“Parnoki par asemji azü shi achiba agi asü ta memetet, anungji kecha marendaki iba shiji chir shiranga ait,” ta paisa ashi.

Iba shi chir shirangertemji tashi melii tang laotsü amai akümba den saktsünütsü atua liasü aser parnok rongnung kabo Hombar nikongdang tashi nung kanga mejungi liasü, ta Kong Kimny-i ashi.

Anünga aliba azü shiji tendangtsü asoshi ‘provincial food safety bureau’ dangi yokogo, ta Kimny-isa ashi.