Cameron-i Jihadi John arishia aputsü ozüng agütsür

London, August 24 (Agencies): Britain Ato Kilonser, David Cameron-i par intangitsü telok, MI6 nem ‘Jihadi John’ ta ajaba kiralongrar tetsüti arishia aputsü mesüra tepsettsü maparen tali bendanga agüja inyaktsü ozüng ka agütsüogo.

London nung asosang, Jihadi John-i Britain linük tanaben buhia oa idakji nisungtem tekong tangja tepsettsü maparen maneni inyaktsü amokmerenba olen ka tawa metetdaktsüba sülen Cameron-i tanü iba ozüngji agütsü.

Aji oda, par lenisangi ozüng agütsüba ama, Islamic State (IS) ta ajaba kiralongrar telok tenüng nung Britain nüburtem tepsettsü osang sangoktsüsang, Mohammed Emwazi aputsü mesüra tepsettsü asoshi MI6 ketdangsertemi maparen tenzükba osanga jangjaogo.

Alima ajunga dang pa tejak ken danga sayua malisang, Emwazi-ia taoba hopta tatembanglen video ka ajanga pa tejak mapang tatsüka asoshi sayuba osang bushitetogo.

Taoba mapang computer programmer ka lir külen IS telok tenüng nung nisung tepseta merenshisang, arishi küm 27 tain Emwazi-i Syria nung par IS teloki tashiyim agi pua ayuba Britain sensotem tepsetba kulia bushiteta lir ta Daily Mirror-i metetdaktsü.

Britain nung tentetba intelligence aser special forces ketdangsertemi taoba ita ishika tejaklen nungi tenzüka tangar shinga nema memetetdaktsüi Iraq, Syria aser Libya nungeri oa IS telok mitsü tenzükba osang bushiteta lir.

Parnoki iba maparen inyaktsü tenzükba sülen Middle East nung lendong kanga sashia atalokdaktsüba IS züngsem aser lenir jenti tepsetba osanga bushiteta lir saka parnoki Jihadi John-bo tanü tashi memenepi lir.

“Alima tesem mashika nung ozü Britain sensotem anema tashiyim agi aser ozüng alema inyakertem nokdangtsü asoshi ozü Britain-i nungdakba maparen inyaktsü renema lir,” ta Cameron-i taküm February ita metetdakja lir.

IS telok anema raratsü nükjidong nung MI6 telokia Syria, Iraq aser Jordan nunger nung itangiter jenti ayutsü tenzükba den külemi, France-i tentetba DGSE intangitsü telok dena külemi amalitepa IS mitba osang jangjaogo.