Cameron-i Syria nunger refugee-tem den Lebanon nung ajuruteper

 

Beirut, September 14 (Agencies): Britain Ato Kilonser, David Cameron-i par Britain linük jenokdaktsütsü asoshi renemba Syria nunger refugee nisungtem den Lebanon nung tanü Hombar nü ajuruba osang jangjaogo.

Cameron-i tanü Beirut yimti tonga aoba sülen Lebanon Ato Kilonser, Tammam Salam den ajurutepa Islamic State (IS) kiralongrar telok den rarabaren nung par Britain-i Lebanon mitkartem den maneni yariteptsü tenangzükba olen ka metetdakja liasü.

Cameron-i Salam den ajurutepba jakdang, pai Lebanon anüdoklen densemba Bekaa Valley semdanga Syria nung raraba tongpang nungi pei taküm kümzüka alitsü nükjidong nung par Syria toktsüba refugee nisungtem den ajuruba osang jangjaogo.

Syria nunger meyirijang jenti par linük toktsür lendongtsüngdong jenti ajurua tzüyim aser tekong naprongla ajanga Europe nung jenoktsü merangba mapang ka nung Cameron-i tan Beirut semdanger lir.

Ano külen, par Britain-i taruba küm 5 tsüngda nung refugee nisung 20,000 shi par linük jenokdaktsütsü lemtetba osang ka Cameron-i tan September ita tetenzülen sangokja lir.

“Ni tanep Bekaa Valley semdanga idakji jenoka alir Syria nunger refugee nisungtem den ajurutepogo. Item refugee nisungtemji ozü Britain linük jenokdaktsütsü sentong renema lir,” ta Cameron-i tesülen osangbener den ajurutepdang metetdaktsü.

Cameron-i tanep semdangdak,  Bekaa Valley ya Syria arrtsü nungi mile ka shi pilar aliba osanga jangjaogo.

Lebanon-i kidangsüa aliba Syria nunger refugee nisung million 1.1 dak tema par linük jenokdakja aliba osanga bushiteta lir.

“Syria den sentakba mangatettep ken o yimtenren sentong kar ajanga mebentet tashi Europe-i tang ajurushia aliba refugee nisungtem den sentakba khuret ya manentsütettsü,” ta Salam-ia metetdaktsü.

Syria Tir, Bashar al-Assad-i aniba sorkar aser sorkar anemer na tsüngda mangatettep ken o adoka tongpang kanga sashia raraba ajanga Syria nung alir nisung 250,000 dak tema asüba den külemi, par nübur million 4 shi par linük toktsür kidangsüa aliba linük balala nung tang jenoka aliba osang bushiteta lir.

Tang Lebanon nung jenoka aliba Syria nunger refugee nisungtemi timtem aser tetsükdakba kecha majurui Britian linük tongdaktsütsü nükjidong nung Richard Harrington Syria refugee nisungtem indang minister shima yutsüba osanga Cameron-i tanü metetdaktsüogo.