Cameroon bomb lendong nung tajemba agi 10 pokset

Yaounde, September 13 (Agencies): Deobar nü Cameroon anüdoklentip tsütsü aliba Kolofata jila nung, arishi küm 14-16 tsüngda tebur anati taküm tenlaa temang nung tapoktsü alenloker apokba ajanga tajemba agi nisung 10 süogo aser 14 yirur lir, ta sorkar ketdangsertemi metetdaktsüba mapang, iba lendong ya Nigeria nung alir Boko Haram Islamist telungpur mapa mesüker, ta shisem.
Tapoktsü mezüngbubaji jila nung tzübo ka anasa apokdang tajemba agi nisung asem pokset aser tanabubaji tenla ki ka anasa apok, koba ajanga tajemba agi nisung pezü pokset, ta tesem nung deputy-i ashi.
“Kolofata nung tapoktsü ana apokba ajang nisung 10 poksetba osang ni tongogo,” ta Communication Minister Issa Tchiroma Bakary Reuters osangbenertem dang ashi.
Kolofata ya Nigeria anüdoklentip arrtsü anasa lir aser Boko Haram telungpuri mapang shia iba tesem nung timtem agütsür.
Cameroon linüki iba tesemlen sepai aika agüja lir aser takümsa Boko Haram telungpur anema operation aoba mapa tenzüktsü sentong lir.