Cameroon Train lendong nung nisung 53 shi asü

Cameroon yimtiba, Yaounde nungi kilometer 120 shi pilar, Eseka jila anasa traintsüng intep nungi temaleni lungteta tugua, lenkümpoklen meküboka aliba noksa nung angur. (Yaunde, October 22)

Yaounde, October 22 (Agencies): Cameroon yimtiba, Yaounde toktsür par tongti shishilembadak, Douala bushia aoba train ka train intep nungi tetsüng lungteta tugua, lenkümpoklen meküboka, lendong yashi, Hokolbar nü ajuruba osang ka Cameroon’er ketdangsertemi metetdaktsüogo.
“Tan atalokba lendong nung nisung 53 shi asüba aser nisung 300 shi yiruba osang tang tashi nung jangjaogo. Tan lendong nung nisung yiruba osangji tang jangjaba dang nungi timba akümtsü akok,” ta Cameroon Transport Minister, Edgar Alain Mebe ngo’o-i osang jangjashitsü.
“Yaounde nungi Douala bushia aoba anepdang jajaba train nung yimya agi passenger car 8 dang alir saka senzüsenponger tali akümba yong iba train nung passenger car 8 tashi tali mesenloksemba osang angazükogo,” ta pai shisem.
Tan train lendongji Yaounde nungi kilometer 120 shi pilar, Eseka jila anasa atalokba aser taoba mapang nisung 600 aniba train-i lendong atalok nübo nisung 1,300 shi aniba osang ka The Associated Press-ia metetdaktsü.
Tan lendong ajuruba train-ji France nung tentetba Bollore Railways kübok Camrail teloki ketdang asüba train ka aliba osang jangjaogo.