Canaan Farmers School ya kechi ?

– Dr. Sunep Imchen.

Iba ya Canaan lima indanga masü, aluyimba school-a masü mesüra shisaliok bushidak school a masü, saka item ajak nungji kongshia, len sayuba aser tongtibang süa shisatsü tangatetba melenshidaktsüa(mindset change) sayuba riju ka lir. 1931 küm Korea nunger Kim Yong Ki (1909-1988) ta ser kati ibai tenzük. Ali temo maliba tesem ka (barren land) rongsen dalang agi alizüka yim akümtsü aser iba nungji meranga inyaka züsena tenükshitsü yimtsüng (Ideal Village) ka küma yangertsü ta asübaji pa nükjidong liasü. Aliji majung masü saka nü shisatsüji meshitak ta pai sayu. Tanemtanemi Ideal village tangatetba nungi Canaan Farmers School (CFS) ta aküm. Canaan Farmers School ta asüba ya shisatsü tangatetba (mindset) melenshiba aser mapa ajak nung samanir (pioneer) süa koba ajanga taküm libaliro (lifestyle) melenshitsür, iba ama tesayudak tesem ka lir.
Mezüngbo aki-alu maparen indang dang jembia tenzük, saka tanübo Yimten Yimsüsürtem, Arogo lenirtem aser business lenirtem tapu balala dang iba tangatetba sayur. Kechiaser, tanü putu nung, amongtema aser takok ngua sensak & makamait tia endoktsüba maparenji, projects aser programs balala ajanga inyaktsü akoker saka iba den külemi lenirtem shirnoki item mapadongji anir inyaker, parnok nem tangatetba aser inyaktettsü tashi tesayuba agüja anidaktsübaji tongtibangba lir.
Lenir ka mezüng lenisüba jenjangji tangatetba melenshibaji lir (mindset transformation). Tangatetba melenshi nung dang nisung ka takümji melenshitet aser iba temelenshiba jagi dang pai telemtetba agiba aser iba amaji inyaktsü atongtetba jagi taküm libaliroyima ka kümdaktsür. Aji oda tanübo linük terka tashi nung CFS tenzüka lir aser asen lima nunga Tuli nung iba CFS ya ABAM ajanga tenzükogo. Canaan nüngja amshibaji tetezü ka lir. Ibai Tsüngremi Abraham nem tenangzükba lima agütsüba linük ka nüngja, koba linük nung mamatsü aser ninang mochitsü talubosa ayimer. Iba tenüng nung ya tetetzü asem keta lir; 1. Political, 2. Economic, 3. Religion.
1. Political : Tsüngremi, nangzükba teimla agütsüba linük.
2. Economic : Tatem maka temoatsüba lima, kong mamatsü aser ninang mochitsü
talubosa ayimer.
3. Religion : Tsüngremi shimba aser aniba linük aser atangji nung iba amala
lima kati aitsüji temela masütsü. Yihuda nüngeria iba linüki aitsü
küm lir agi.

Kechiba iba ya tenzük?
Korea nunger pi kin kübok talisa Japan nunger kübok alar amai küm 35 tashi alitsüsa akümbaji parnok azümesenba aser mapa meinyaknüba yong ta Kim Yong Ki-i angatet.Pa tulur Buddhist kibong ka nung aso aser lanuwa nungi parnok amala kibongibo mapa meinyaker aser inyaktsü nüngdak mali, tangari dang inyaktsütsü ta sayua intet. Saka Missionary kar ajanga kodang tebu Yisu Khrista agizüka tamanger aküm, tangatetba ajak melenshi aser pa merataket aluyimer ka aküm. Pai angazükbaji, “alima nung maksü tulutibaji mapa meinyaki chiyungbaji lir” aser “tekolak nungi asentsü sena chiyungbaji alima nung akhüm aser merah taket tulutiba”. Pa küm 23 alidang tebu asü aser tebui pa nem toktsüba shidi ka nung yamai zülur liasü, “kechi südir süaka na aluyimer ka akümtsüla”. Iba o jagi pa kanga dang kongshi aser pa taküm nung tangatetba melenshi. Iba ajanga Korea lima, talisa South Korea nung pai par nüburtem shisatsü aser tesayuba tajung agüja par lima sensakpu tia nungi küm ter tsüngda nung Industrialized nation (1961-1971) ka küma indaktsü aser tanübo alima nung takatiba linük rongnung ka ta züngsema, asen lima nunga Korea nungeri adokba aser yangluba osettsüsetang sapua amshir.
Aji oda, pa arishi tepiyong alitemo maliba lushi Hushia idakji alu yima, aluyimer nem shisatsü aguja, nüburtem Tsüngrem o nung sayua aki-alu koda tesangraba nung purapiteta inyaktsü sayu. Ali temo maliba tesem kaji koda inyak nung ali temo lia, tsünüsenpongtsü züsentettsü, aji pai inyaka sayu. Pa aliba mapangji Korea nunger otsü nung tensa tamajungtiba mapang ka liasü; yasatzüra aser sensakpu tia nung aliba mapang kechiaser idangji Korea nunger Japan nunger yimsüsüba kübok aliba mapang liasü. Parnok, 2nd world war sülenang nüjiso angu saka kobi melii Korean war (1954-59) adoka par lima ajak menakrepa bomb agi poksaa rongdoktsü aser tia maka North aser South Korea ta ana küma lemdang aser tanü tashi aji oda lemdanger alir. North Korea-ji communist yimsüsüba aser South Korea-ji democratic linük ka aküm.
Korea lima koba dang Korean Peninsula ta ajar, iba tesem ya nisung alitsü tenzüker tanü tashi ken danga metangtangi meimchir sobalibaa aliba tesem ka lir ta alima otsü puti meteteri ashir aser aji oda küm meyi pungo tashi nisung lia aruba otsü zülua aliba linük ka. Parnok oshi ka dang saka ken danga nüburtemji chuba ka kübok mesüra yimsüsüba ka kübok melidang aser tanü tashi aji oda parnok kin ka dang aser oshi oben ka dang süaka lungjemer ka küma meliteter. Iba ama tia tensa ka nung Kim Yong Ki-i par nübur asoshi kanga dang süoki yia bilem aser jembi. Pai item ajak mapa agi inyaka sayu. Pa tamang nung kanga dang takang aser pa taküm tamang aser Canaan Farmers School tamendakdak Lai Oji Mathi 6:33 liasü.
Pa samanir (pioneer) ka liasü aser tangara iba amaji lidaktsünü. Pai teti bangpet küma o kar yamai jembi, “Tangar dang mapa inyaktsü teshi, saka nai tama inyakadokang”, “na tema tereprangtsü dang merüka teyu, saka ne mulungjang merükteta yuang”, “nai mapa meinyaknera, techiyong”, “Kü linük, tasü itang”, “nai kechi perok, aji dang nai arutsü”, “Lanurtem, Yimtsüng len jagi oa na samanir küma liang”. Item o jembia pai pei nübur tem anogo shia ajungshia ani. Aji oda pai telok tila la anir tenükshitsü yimtsüngji (ideal village) aküm. Aliji pai alitsü aser yimji kümli ta asü. Yimtsüng nungji kodang pai sayuba ama angazüka noktakteta kümdir pai toktsür mesüra yoker yim tasen ka akümi oli ta terok ben tashi pai yim aküm. Saka pungo benbuba akümba mapang nungiang, yimtsüng dangji Canaan Farmers School (1954) ta aja aser ibaji Hanam nung lapok. 1973 küm Sillim Canaan Farm & Wonju Canaan Farmers School lapok aser tang iba ya Canaan Farmers School Head Quarter lir. Idaki par arua alitsü tenzük dang par lu den artsüa aliba yimertemji (Yeonbongjeong village) kanga süngmang kechiaser iba tesem nungji ali tamajungtibaji pari alizükba aluji liasü. Koma südir ta dang repranga ata aser item nüburtemji ajak kanga sensakertem liasü. Chi achiba kin saka parnok timbakati chi mungdang. Arem süngolemba aser kolar dang achi aser arem nung süngzüng longzüng bendena yi saa jemli ta dang liasü kechisaser ali majungba den azümesena aki alu mapa inyaktsü mashi liasü.
Kim Yong Kü iba tesem jagi arur mezüng par ki ka yanglu aser ibaji menti dong agi taktang ana aliba ki ka asü aser kima atsü inyaktsü tenzük. Kodang ita ishika tsüngda nung atsüji inyakteta aser shiruru metsüteta aküm, iba yimertemji kanga süngmang aser aruagi parnok danga inyaktsü sayuang ta mepishi. Tanubo Korea lima nung iba Yimtsüng takatiba rongnung ka aser parnoki inyakbaji naro aser organic aonsotsü lu ayimba maparen lir. Sillim nung aliba CFS ya ali acre 120 shi nung yangerteta lir aser shilem as em klima lemdanger maparen balala inyaker. Parnok talidak aser sarasadem ki tenem kolak lenji yanglu aser iba kübokji training agidak ki tern yanglu, aser tenemtsüng wapetsa nungji alu yima shiruru metsü. Mapa inyakba yari dang chiyong. Tsük mesüra barley asenoki semki nung sena suror achitsü dang ashi, saka iba yimya ya aki tetsü tebuotemi achiba yima lir, anungji asenokibo item chiyungtsütem yimya balala nung aser tapu balala yangluteta achitsüla ta sayu.
Idakji 1954 mapang tashi, pai aluyimtsü indang aser kibong nung koda alitsü aji dang jembia aser sayua aru. Kechiaser par putu mapang ibaji tongtibangtiba mapa liasu. 196 hküm Gen. Park Chung Hee, Civil Govtji atsüngdok aser pa President aküm. Korea lima koda masüba mapang ka liasü. Künu iba lenir yagi yimtsüng kabo kanga dang jangratemtsü ka yimjiyimjung nung lir ta osang angashi aser pai iba yimtsüngji semdangtsü lemtet. March 9, 1962 kum Gen Parki Hanam CFS semdang aser pai Kim Yong ki dang yamai as hi, “we led a political revolution but you led a lifestyle revolution”. ”Asen lima anitettsü atema nai ner kibong aser ner farm nung mapa advance nung tenzüker ata. Asen nebur ajaki nai inyakba aser sayuba amai benshira asen sensakba aser makamait tia ya yakta dang melenshiatoktsü, nai inyakba aser sayuba yimya ajanga asen nübur junga alitsü” ta Presidentba jagi ashi. Pa tamanger masü saka Kim Yong kü Laishiba tesayuba ama mapa inyaktsü merangba aser sayuba nung pa kanga temulung achi aser aji oda anogo metsü tsüngda nung Yimsüser aser tulur noklang 700 tashi yoka iba CFS nung training agidaktsü aser idangji Government-i yimtsüngtem ajungtsü mechi maparen tasen ka tenzük aser iba dangji New Village Movement (Saemaeul Undong) ta aja. Iba sentong nung 1972 tashi nungbo yimtsüng 33,000 nungi tetsür ka tebur ka ta hapta ka ka shi, pei yimtsüng yanglushitsü atema aser pei nübur tenzüktsü iba mindset change training CFS nungji arua agidaktsü. Kim Yongi ki sür külen par chir tanabuba Kim Bum II, CFS nungji President ka ama tenzüker aser alima ajunga nungi lenirtem arua idaki mindset change aser leadership development training agir.

CFS nungji kechisa sayu?
Tesüngmangtsüji Laishiba dak alaka tanga kaket mesüra tanga kaket kata maliasü. Kim Yong Kü kecha tesüngmangtsü ka meinyak mesüra kecha balaka mesayu. Pa taküm otsü, par kibong libaliro aser par yimtsüng nung alir inyaksangshiji dang Lai o nung ‘ajemdaker lia sayu aser aji ajizükdaktsü. Nüburtemi ibaji ajizüka benshitsü jangra. Kechiaser pa jembiba ama inyakba nisung ka liasü. Pa mapa aser jembishinü agi tangar pua melenshidaktsü. “asenok ajak külemi inyaktettsü…. Merangdangdi arung aser…. Yimjiyimjung asoshi asenoki inyakdi” ta sayu. Kechi inyaktsü aser aji koma inyaktsü sayu. Teka külen mertsüng, külen Laishiba amer inyaksang ta tangari jembi. Chiyungdanga külen laishiba ataloka yur ang chiyung, Anogo shia ghonda pezü sarasadem, anepdang ghonda ana & aonung ghonda ana aser aji par nübur aser Korea lima aser nübur asoshi liasü. Anü madok dang yongi aki alu mapa inyaktsü tenzük aser anü ir manga tashi pai mapa inyak. Kaa ita akümdang aser khunang angudang kodanga lalu shibong masü mesüra taküm libaliro yimya memelenshi, Chiyungdang teti iba amai shirang chiyung, “achitsü atema dangbo techi, saka inyaktsü atema chiang. Nai mapa meinyaknera, techiyung. Nai chiyungba shia ghonda pezübosa mapa inyakang”.
Tanü tashi ibaji CFS nung table manners slogan lir. Kim Yong Kü koleni aotsü meteta liasü.lba lenmang nungji pai jaja aser koda aotsü ajia pai sayu.
Canaan Farmers School tamendakba shisatsüji (ideas)
1. Work, I work first (2 Thes 3: 1 0)
2. Sacrifice, I sacrifice first (John 13:5)
3. Serve, I serve first (John 12:24)

Mapa (Work)
Ni tama inyaktsü aser meranga inyaktsü ta angatetba. Iba tangatetba ya Kim Yong Kii, 2 Thes 3:10 nungi agiteta sayuba lir. Ibai meimchir ka taküm ayanga alitsü atema mezüng shisatsü tangatetbaji lir. Meinyakra shinga chiyungtsü temeten mali. Tetsü tebuo mapang nungi Korea nunger sobaliba kaji akhi alu inyakba maparen ya lir saka tanübo aikati item mapa inyakertem nema repranger, anungji alimaji sensaka alir. Nübur ajaki mapa inyaktsü angatetdaktsütsübaji tongtibang lir. Mapa meinyaki angubajibo auyaba ama dang. Mapa inyakba ajanga dang alima nung sensak tia khuretji sünemtsü ta tangatetba nung sayu. Mapa inyakerang chiyungtsübaji Tsüngremi atemzüka yutsüba maparen ka lir. Anungji mapa meinyakra ajibo Tsüngrem anemer asütsü.

Tenzükba (Service):
Ni tama aser pelaseta tenzüktsü ta angatetba. Iba ya Yohan 13:5 nungi agiteta sayuba lir. Iba nung ya tangar asoshi inyaktsüba ajak dena lir. Yisu Khrista-i inyakba ajak, mezüng sayatenya inyakba nungi kangkidong nung asüba tashiji tangar asoshi inyaktsüba dang liasü. Yisui, na tulu kümnera, nai tama tangar tenzükang ta sayu. Koba ajanga tenzükbaji tongtibang ta sayur. Agütsübaji temoatsü lir, Khrista-i agütsübaji, meimchir temenen tasüba nungi kümzüktsü asoshi Pai Pa taküm agütsü. Anungji asenoki Yisu dang pelar aser Pa külemer. Nisüngji kija alitsü yangluba masü, saka kati ka tenzüktepa alitsü yanglu. Kinungboi kinüngtsü tenzüker, kiyonger tenzüker aser parnoki sorkar tenzüker aser Sorkari meyipa nüburtem tenzüker. Aji kodaka jangratemtsü.
Iba nungji amalitep aser telungjem lir. Anungji meimchir asoshi tenzüktsü tangatetba alibaji, pa loktiliba taküm ka alitsü atema tamendakdakji lir. Tenzükba ajanga, raraba, tesempatep aser tenükmerem samadaktsür.

Tenlaba (Sacrifice) :
Ni tama aser mulungsoa tenlatsü ta angateba. Ibai Yohan 12: 24 nung ajemdaker sayuba lir. Nisung dang temeim sayuba nungji, tenzükba dang nungibo tenlabaji taoba. Temeimji Tsüngrem mulungsentsü tiyongtsü aser nisung asoshi, aji atongtsüji tasaktiba. Khrista kangkiji temeim tenlaji lir. Meimchiri Tsüngrem külembaji Tsüngrem den anasatepa sentaktepa linüba khuli aser iba tesentaktepji temeimbaji lir. Iba temeim nung tajungtiba aser tematibaji tenlaba (sacriflce)ya lir aser tenlaba aser temeimji Khrista-i sayuba dak temaba kecha mali. Tenlabaji teti agi temoatsü nung meyipa angutsü saka, iba ternoatsüji nai inyakba den kanga agia tuluba alitsü.Tebu kati kibong nung tenzükra, kibong nung a1ir ajak pelatsü, saka tenla süa agütsüra, kibongji kümzüktsü. Kinji tenzükra, iba kinji yimjiyimjung nung alitsü, saka kin asoshi kodang tenladir, ner kinji kümzüktsü; kechiyong nisung kati pei kibong aser kin asoshi tenla agütsü. Shitakba tenla agütsübaji temeim meteni magütsütet. Anungji tenlaba tetezü temeimji lir. Tenlaba ajanga koda masü shisabolu aser khuret süshidaktsür, Memeimia agütsüteter saka kodang meimadokdir, magütsüibo melitetter. Iba amaji Kim Yong Kii tesayuba agüja nüburtem tenzüka sayu. Item tesayuba asem benshiba ajanga asenoki Tsüngrem meimba maparen nung shilem agidaktsür. O jembiba mapang süiogo aser mapa inyaktsüba mapang tongogo ta sayu. Shitakba temetetba alibaji inyaktettsüsa meteta aliba asütsüla. Ibaji nisunger mulungjang nung meimbanga ayutsüba ka masü saka teka, tetsüng, azü aser asentsü sena inyaktettsüba temetetbaji asütsüla. Nai nü kolok nung temetetba alibaji, nü teka agi inyakteta sayutsüla. Kenü, pa tasütsü yipten nung liaa yamai ashi, “asen lima ka amala asoshibo, tazüngeri akhi alu mapa nung shilem agitsüla.Akhi alu maparenji alima nung kechisarina asoshi tamentakdak lir. Saka, tanü tashitemeteteri iba maparen ya sentokadoker aser yimtaklir mashimalurtemi dang aluyimba maparen inyaker. Iba jagi asen kin rongsenketsüng aser libaliro meshimejung tia nung yutsü, koba ajanga asen kin yimli Japan nunger nem rakzüka bener odaktsü. Iba yimli tanaben lua bener arutsü atema asenok rongsenketsüng nung peisasa noktaka litettsüla. Aji inyaktettsü atema tanga lenmang kecha mali, saka tashitemetetertemi akhi alu maparen nung shilem agitsüla aser chiyungtsü adokba nung shilem agitsüla”. Aji oda Korea nungertemi kodaser parnoki rongsenren nung Japan nunger ajateta aotsü ta meranga inyak. Tanübo atangji nung parnoki kechisarina ajak nung Japan nungertem den toktepteter. Item tangatetba ya asenokia suoki ia shisadangdi. Asen kibongtem aser Kina kechi jenjang nung noktaka lir ?
Tsüngrem meimbaji, asenok aliba atema kuli tematiba. Ali (soil) meimbaji, asenok alitsü atema inyakyim tematiba. Nisunger nüngdak ajak ali nungi angur….. Nisung meimbaji, asenok lidaktsüba atema nükjidong tematiba. Taoba, Food for the Hungry International, President, Dr. Randall Hoagi yamai ashi, ” Küm 25 tashi ni International Relief & Development nung inyaka aruogo, aser CFS-i agütsüba tesayuba ya kanga shitak ta angateter. Sensak tia akoktsübaji maneni dang iba atema teyari rongsen agutsübaji masü, saka mapa inyakba, tenzükba aser tenlaba ajanga dang akoktsü aser iba den lenir tasentem, shirnoki pei nübur aser pei lima melenshidaktsütettsü ta pungmanger, item ajanga dang alimaji melenshitettsü”. Dr Randall Hoag, tang Canaan-Yonsei Global Agricultural Leadership Center nung Director lir. Canaan Farmers School nung tesayurtem aser instructortemjia sen atema inyaker rnasü, saka tenla süa aruagi tenzükertem dang lir .
1966 küm Kim Yong Ki, 66 buba Magsaysay Award angu aser iba award nung yamai zülua lir, “As a Korean farmer, philosopher Kim Yong Ki, has reformed agriculture by applying the words of the Bible to a practical life and became a living text book arousing a new joy in and a respect for agricultural life …. He took a Bible in one hand and a pick axe on the other, designed and built a habitable and a simple house, ate inexpensive and healthy food, is living in more practical cloths, built a Church which transcended denominations and is making a contribution to Korea by establishing a school where social leaders are being trained”. Item oren yagi Kim Yong Ki taküm-mapa rangben nung kongshia zülu.
Ano, 1978 küm Philipines ming Xavier University ajanga pa mapa atema akhüm agüja honorary Doctorate agütsü dang, pa recognition paper nungji yamai zülua liasü, “His family literally rises before sunrise, works hard and has trained 1,10,000 social leaders, thereby cultivating their self confidence in production and making them useful for God and his creation. Mr. Kim Yong Ki showed in person, the example which our university indents to teach our students;
First, he had shown a firm faith in God and himself.
Second, he has showed a high respect for work and its income.
Third, he has showed an example of valuing nature and its power .
Fourth, he showed an example of working without taking a rest.
Therefore, Xavier University confers an honorary Ph.D degree of Humanity to Mr. Kim Yong Ki who is an outstanding figure, prominent educator, and realistic idealist, upon the occasion of the 45th anniversary of its foundation”.
Canaan Farmers School philosophy nung tongtibang sayuyim kar yamai agütsür;
Asen taküm nung Mission tematibaji Tsüngrem nem sentsüwangshi bener arudaktsütsüba.
Asen taküm nükjidongji asen kin aser lokti asoshi Kangki abentsübaji lir.
Tsürabur akhümtsübutsü, tembartem meimtsü aser pei kin sobaliba aser libaliroyim meraketa benshitsü.
Asenok ochimashi madak takokba nübur asütsü aser tangar dang alia meimba nübur asütsü.Asenoki züsenba nungi Tsüngrem nem mezüng agütsütsü, CFS nung kanga dang tongtibang tesayuba kaji, par tsüraburtem koda timtema aser okronga, tangari alar ama pei lima nung mezüngmeshia tilubangluja lia aru, iba indang kanga dang suoki ia sayur aser ibala noksa reprangdaktsür. Koba tetezü, tanü na iba jenjang nung aliba ya, ner tsüraburtem iba- amai timtema rishikangshia taküm tenla agutsüba yong, anungji na kümdanga liang, Tsüngrem tamadok aser ner tsürabur meima akhümtsübuang ta ashirba lir. CFS tesayuba nung Patriotismji, Inyakerang chiyungtsüba, Süngdong atemtsü aser ali meimtsü, Tsürabur tushitsü, yimtsüyimbutem akhümtsübutsü aser me demer aser tangar dang rneimtsü, aser taküm nung samanir asütsü. Shirnoki itemji benshir parnokji shitakba patriot ta züngshir,
Mr. Ahn Deug Byeom, President of Pyong An Concrete Industrial Company, pai yamai ashi, “I am almost 70 years old, but the reason I went to receive an education at the Canaan Farmers School was to know whether I had lived a good life or not and to evaluate it. After receiving their special education there, I realized that I have not lived a regrettable life. However, I received a great truth from their teaching. The truth is, I was very foolish to think that, as I am old I have no choice but have to wait for the day when I will die. Now after I received their education I have restored energy and a youthful spirit and understanding that I still have a great deal of things to do. I quite forgot about death….. I determined that my life starts from now; and I achieved a great hope and joy”.

Baek Bong Hi, a house wife said like this…..
“when my sons and daughters get married, I always sent them to Canaan Farmers School. This is because no matter how rich the national economy is, or no matter how sufficient an economic situation of a family is, a house wife in charge of the management of a house hold should always be diligent, thrifty and saving”.
South Koreaji Christian lima ka masü. Tamanger noklang shilem nung 30.95% shi dang (Operation world, 2011) saka tamangertemi tebang agi dang masü saka mapa agi aser taküm yimya rangben (lifestyle) agi Khristan taküm kaji yamai alir aser alitsüla ta lia aser inyaka sayutet nungji, tanga yimsü amangertemi aser kecha yimsü nung mamangertemia parnok akhümtsübur aser pelar. Asenok experience ajanga metetbaji kanga tajung, saka tangar experience nungi angazükbaji kanga agi tajungba. Naa koda ? Koda asütsü ?
Hau, nai inyaktettsü. Hau, ni inyaktetsü. Hau, asenoki inyaktetsü, ta tangatetba nung sarasadema iba ocet tila ka ajanga tazünger ajak ayongzüker.