Canada Ato Kilonsor Trump Tir akümba sentong nung madentsü

Toronto, January 07 (Agencies) : Canada Ato Kilonser US Tir atema shimteta alisang, Donald Trump, January 20, 2017 nü Washington nung Tir mendeni atuba sentong nung arua medentettsü.
Washington nung oa Trump Tir mendeni atuba sentong nung adentsü melena Canada Ato Kilonser Justin Trudeau Canada sema linük nung aliba nüburtem den senden mena jajatsü sentong yanglua lir, ta Hokolbarnü Ato Kilonser office ajanga metetdaktsüba Efe osang ajanga ashi.
Canada sorkari Trudeau melen Ottawa nungi tongtibang nisung ka iba sentong nung adentsü asoshi shima yoktsü.
Trudeau-i linük sema senden mena jajadang küm shia Switzerland nung amungba ‘Davos World Economic Forum’ nunga medentettsüsa akümtsü.
Canada nung US Ambassador, Bruce Heyman-i pa mapang nungi anentsü atema resignation shidi agütsüogo aser Trump Tir mendeni atunü official süa Canada toktsütsü.
Tir Barack Obama-i shima aliba ambassador ajak January 20, 2017 tashi nung mapa nungi anenang ta Trump-i metetdaktsüba sülen Heyman-i pa mapa nungi anentsü atema shidi agütsü.