Canada-i küm ka tsüngda Syria nunger 10,000 arudaktsütsü

Ottawa, September 20 (Agencies): Deobar nü Canada Conservative sorkari, linük ka nungi ka nung oa alitsü tezülutepba tekaratiba nung tembanger külen, küm ka tsüngda Canada nung Syria nungi refugee 10,000 anioktsü, ta metetdaktsüogo.
Iba tezülutepba renemer sülenbo Visa reprangertemi parnok United Nations (UN) ajanga melaba refugee-a ta metettsü asoshi tezülutepba asüngdangtsü kecha tenüngdaktsü madoktsü. Ajisüaka ainer-a ta asüba nungibo mejenbutsü, ta ministry of immigration & citizenship sangdong ka ajanga ashi.
“Anungji onoki tang Canada-i September 2016 tashi nung Syria nunger 10,000 tashi linük nung anioktsü ta asübaji takoktsü mapa ta imlar. Canada-i Iraq nunger 23,000 par linüki anioktsü nükjidonga taküm küm tatemlenbo tongtettsü,” ta sangdong ajangasa ashi.
Kasa sangdong nung shia aliba agi, Visa ketdangsertemi bendanger anioktsü interview agidang parnokji ochi nisung asü masü, ozüng alema benshir mebenshir aser tashidak tamajung keta ali mali nung rangloker agitsü.
Syria nungi talidak melii Mediterranean nungi Europe tashi nung nungokertem jenokdaktsütsü atema kara acha ayang masüba atema nüburtemi Canada nung tang yimsü tesüdak, Conservative Party aija liasü.
Tan October ita election nung takok ngura Syria refugee tem atema telamtetba tajungba ka agitsü, ta opposition party-i nangzükogo.
Tang tashi nung Ato Kilonser Stephen Harper-i aniba Tories party aser center-left party na kanga toktep-a jenjang kasa shi nung lir.