Canada nunger kentener Leonard Cohen süogo

November 11, 2016 : Canadia nunger kentener aser ken zülur Leonard Cohen arishi küm 82 nung süogo.
“Asenok ket nungi kanga tang akhümtsübua aliba kentener ka pilaogo,” ta artist’s official Facebook page nung post süa lir.
Pa süogo ta asüba dak alaka osang talila kecha ano mesangdong, saka pa asütsü ita ka lia Cohen-i, “Ni asütsü renema lir. Asütsüji kanga timtembo masütsü ama ni imlar. Ni atema joko ajidang,” ta New York nunger dang shia liasü.
Pai sangro mesüka züluba kenjangtem ajanga nisung ajaki pa kanga akhümtsübua liasü. Cohen-i nüngtugu ken aika züluogo aser item rongnung tensa ajak nung atenba “Hallelujah” ken-a dena lir.
Pa indang studio kensep 14buba “You Want It Darker,” October 21, 2016 nü ang saya liasü.
Iba kensep yaritepa produce sütsüsang Cohen’er jabaso Adam-i, kübo-i pa kensep tajungtiba ka sayaogo ta meteter iba lima nungi pilaogo, ta sangdong ka ajanga ashi.
“Pa tasütsü mapang tonga teti ama kanga pelaseta maneni ken zülua liasü,” ta pai ashi.
Cohen indang manager Robery Kory-i, pa mapatem agi tarutsü pututem kanga ajungmesotsü, ta ashi.
“Purapitetba, tangatetba tajung aser tajung majung bendangtetba tsütsü Leonard Cohen shingaia memeneptsü aser pa ola tajung kanga menüngratsü,” ta pai sangdong ka ajanga metetdaktsü.
Ken züluba tang masü saka Cohen-i novel aser sangro aika züluogo.
Cohen ya tesüiba mapang pa tetong Marianne Ihlen sür külen küm ka majung dang asü – la masüdang Cohen-i la dangi shidi ka zülua liasü aser iba shidiji alima rangben sünga prokshi, ta CBC osang ajanga ashi.
“Iba shidi nungji, Marianne, joko asenok kanga tantsür aser tambur kümer asen temang rangben loksaa taoer aser nia memunui nü sülen anidaktsü ama bilemer. Ni nü sülen kanga anasa alitsü ta nai metetang aser nai nü teka songla nung kü teka nung amshitsü amai ni bilemer,” ta zülua aliba Ihlen’er medemer Jan Christian Mollestad-i CBC Radio dang ashi.