Canada PM Justin Trudeau-i India semdangtsü

New Delhi, Aenjeti 22 (Agencies): Linük ana tsüngta tembatinu akhangshitsü asoshi Tsüklai 17 nungi 23 tashi India semdangtsü, ta Canada Ato Kelonser Justin Trudeau-i Tentonü metetdaktsü.
“Canada aser India tsüngta tesendaktep balaka lir aser nisung o nisung na tsüngta tesendaktep aika lir. India nungi jakzükba Canada nunger million ka dak tali aliba ajanga linük ana tsüngta tesendaktep ya khenyongi balaka lir. Ato Kelonser Modi ajurur Canada aser India tsüngta tesendaktep takangshiba akümtsü imla atar,” ta Trudeau-i ashi.
Trudeau-i India semdangba mapang Agra, Amritsar, Ahmedabad, Mumbai aser New Delhi nung anentsü, India nung sorkar lenir aser shishilembartem den sensaksemtsü aser tetsürtem temeden ajungketba mapa inyaktsü imlar.
Kasa mapang Canada aser India tsüngta shishilembaba ajungkettsü mechi senden aika nung Canada Ato Kelonser adentsü.
Ato Kelonser Trudeau-i Yimpoksüi 2015 nung office agizükba sülen Canada nungi Cabinet Minister 11 tashi India semdangi arua lir.
Canada nütsüng shilem 3.6 bo India nungi jakzükbatem lir.
Taoba mapang nunga Ato Kelonser Trudeau-i par linük nung aliba India nunger den Diwali aser Pongal ama benjong külemi munga aru.