Cancer agi shiranger nisung 13 nungi kabo India nunger lir

New Delhi, October 13 (Agencies): Kanga tetsübutsü osang kaji, alima nung cancer agi shiranger nisung 13 rongnungi nisung kabo India nungi lir, ta Times of India osang ajanga metetdaktsü.

Ano jembitsü agi, alima nung cancer tashitak agi shiranger nisung 13 buba shiaji India nunger lir.

US Department of Health and Human Services (USDHHS) indang unit, National Cancer Institute (NCI)-i ashiba agi, alima nung cancer tashitak khuret shilem tulu ka India-i bena lir aser iba tashitak agi asür jenti kümdar.

India nung cancer agi shiranger nisung million 1.8 shi lir, aser item rongnung mama cancer, cervical cancer aser oral cancer ajanga timba tepseter.

NCI-i Public Health Foundation of India aser Institute of Cytology and Preventive Oncology (ICPO), Noida den senteper October 12 aser 13 nü ‘International workshop for scientific journalism’ ayongzüka liasü.

NCI (South Asia) Programme Director, Preetha Rajaraman-i, cancer tashitak koktettsü atema alima linüktemi yaritepa inyaktsüla, ta shiogo.

“Tashitak (cancer) nokdangtsü aser teyari agitsü osang nüburtem nem rajema kümdaktsütsü asoshi osangbenertem nem training agütsütsü nükjidong nung inyakdar,” ta Rajaraman-isa ashi.

2014 küm India linük nung nisung lakh 5 jungnüa cancer tashitak agi süogo.