Cancer tashidak metsübutsüla

Atangji, cancer ya tashidak tamajung saka aneptsü akoker, anungji metsübutsüla. Yakanü alima cancer anogomong nung Nagaland nung iba tashidak agi shirangertem jenjang asadangba nung taoba küm trok tsüngda cancer agi shirangertem teimba-teimba akümba osang ka metetdaktsüogo. Ibaji asenok asoshi tetsübutsü osang ka masü saka tekümdangtsü osang ka südaktsütsüla. Cancer tashidak agi shiranger masüyonga mekümdangra tashidak tilaka agi tulu küma taküm samatsü, ajisüaka kümdanga lia mapang shitak nung anepalura cancer tashidak agi shirangyonga anepadoktsü. Iba ama taküm kuli aika asenoki angashitsü. Atangji, asenok Naga nunger asoshi cancer tashidak ya tasen ka masü aser ano Naga nungertem rongnungsa asüyonga asenok Aotsür Aortem dak iba tashidak agi kanga bolua atonger. Ibayongji, cancer tashidak ya shi takong aser metsü ngashi ama achiba agi adoker asü ta bilemer. Ibaji shitak asütsüa akok mesüra tai asütsüa akok, saka ochi o kaji cancer dang masü saka tashidak teimbaka asenok libaliro aser achiajemba nungi adoker. Aji oda, yi ajemba aser moko achiba nungi adokba tashidak agi asenok aika kangshir. Ano, yi majemyonga aser moko sali machiyonga aon nung mersü tashi tali enoka achiba agi mesüra tasen tali achiba agi poknüngbokra nung tashidak adoka asenok aika kangashia alitsü. Ibaji dang masü saka nisung karbo chiyongtsü kanga kümdanga achir aser peisasa pei taküm kanga azüoka alir, saka temang nung asentzü mesendokba ajanga tashidak adoker. Ano, karbo tzü tamajung ajemba ajanga temang nung tashidak tulu menar, ano karbo shi azü mazüokba nungi tashidak tamajung menar kangshir. Aji oda, tanü putu nung adokba tashidaktem agi nisungtem kangshiba asenoki reprangdangra, tashidak aika cancer tashidak dang nungi tamajungba agi shirangba angutsü. Akhidangbo, tzü aser mopong nungi menaba tashidaktem dang liasü saka tanübo peisasa menaba tashidaktemang tuluba kümogo.Iba ama tensa ka nung nisung ajaki pei taküm anema alitsüba indang kanga junga meteta alitsü nüngdaker. Alima asünungji, nisung shirangtsübaji tim dang lir, kodanga meshirangbajiang alima nung alir memesük asütsü. Ajisüaka, shirangba mapang anepaluba dang nungibo meshirangdang meshirangtsüsa asen temang meima anepalubajisa tajungba lir. Aji oda, kodang shirangdir, jet ta doctor ajurua anepaludaktsütsübaji kanga tongtibang mapa ka ama bilema inyaktsüla. Asenok aikati shirang tenzükdang doctor dangi moii peisasa mozü alia achir aser karibo peisasa ajem alia atur. Ano, asenok aikati Gopiraj mozü achir. Item jagi aneptsü melen tashidakang tuluba kümdaktsür. Aji oda, tanübo tashitemetet putu asünungji asenoka tashitemetetter ama medical science dak amanga asen temang anepalutsübaji atsüayong masütsüla. Asen temang nung cancer tashidak putet dang balaka asenok aoksar, kechiyong cancer tetezü tasüba ta asenoki bilemer. Ibaji asenoki mangatet aser memetetba ajanga lir. Ajisüaka, asen temang nung cancer putetbaji kecha masü, aneptsü kechiyong cancer ya maneptsüba tashidak ka masü ta asenoki angatettsüla. Atangji, cancer agi nisung aika süogo saka cancer agi asüba dang nungibo tanga tashidak agi teimba süogo. Aji oda, tasür aika liaka ano cancer tashidak agi shiranger anepba taküm kuli aika lir. Itemji tasü tait aser mapang shitak nung anepalurtem lir. Cancer agi shiranger aika cancer tashidak agi masü saka tsübuba agi asür. Alima nung tashidak tulutibaji tetsübu ya lir. Aji oda, asenoki cancer-bo akoker saka tetsübu makoker. Iba amaji mesüi tang nungibo asenoki tashidak tsübutsüsa masü saka tashidakiang asenok tsübutsüsa tasü aittsü aser tangatetba tulu nung kümdanga alitsü merangtsüla.