Candidate masü yimten telok tongtipangba: K Therie

Dimapur, September 27 (TYO): September 22-27, 2017 tashi Tobu, Tuensang, Kiphire, Phek aser Pfütsero nung NPCC District Tour agi.
Sentongtem nung o jembidang, NPCC tir K. Therie-i nübortem dang yimten telok balala indang Election Manifesto tem angatettsü merangang aser iba sülen party indang candidate nem vote agüjang ta tayongzükba agütsü.
Asenoki candidate repranga vote agütsür saka shitakbabo party jagiang sorkar kümteter, anungji asenoki party tangatetba jiang repranga vote agütsütsüla, ta K. Therie-i ashi.
NBCC-i ketdangsüa agiba Clean Election atangji nung ataloktsü atema Naga lokti sarasademer anungji asenoki vote mayoktsüla, kechiyong vote alia akümba sorkar jagi nübortem atema mebilemtsü aser mapa meinyaktsütsü, ta paisa shisem.
Ochimashi mapa sadoksadoka inyaktsü atema MLA temi NPF-i aniba BJP-DAN sorkar nung aden aser opposition maliba sorkar kümtet. Congress-i sorkar ketdangsüba sülen Nagaland kübok district tem nung terenlok kecha mali. Congress sorkari yanglua toktsüba infrastructure tang aliba sorkari anepalu mesüteter. Asen state nung ochimashi agientsü atema Congress-i Tsüngrem tsübuba candidate tem shima Tsüngrem tsübuba sorkar ka tentettsü, ta K Therie-isa metetdaktsü.
Tang teinyakdak MLA temi terenlok bener aruba aser nübortem yariba ajanga vote mangur saka sen agidang vote angur ta amanger. Iba tangatetba ajanga tanü commissions, percentages, bogus bills aser süpokrem kanga bulur, ta Therie-isa ashi.
Nübortemi sen tashi metsübutsüla kechiyong taruba election nungbo sen ajanga vote mangutsü. Taruba election ji BJP aser Congress den yimten 16 secular alliance tsüngda tokteptsü. Linük nungi BJP atsüngdokba sülen democratic aser secular sorkar ka tentettsü. Prime minister menden nungi Modi atsüngdoktsü atema mapa tenzükogo aser taruba Prime Minister ji Rahul Gandhi asütsü ta temulung lema ashir, ta NPCC tirisa shisem.
Therie-isa ashiba agi, tang sorkar ketdangsübarenji centralized süogo aser Kohima nungi work orders agütsür aser Kohima o Dimapur nungdang sen agütsür. Congress sorkar arura sorkar ketdangsübaren decentralize asütsü.
Paisa, NPCC Roadmap nung dena aliba MGNREGA kübok Job Card holders nem anogo 100 taa agütsütsü, State road category ‘C’ Grade nungi ‘B’ Grade ajungkettsü, Cashless Health Cards, infrastructure aser nüngdakba maparen inyaktsü onüktem metetdaktsü.
Sentong balala nung Shaboh Konyak Ex-MLA & Secretary, NPCC, N. Lucy, President, NPMCC aser Vilhousielie Kengruse, President, NPYC nungertemia o jembi.