Candidate o angadangang aser metetmaang: LKMCECC

Dimapur, Sept.10 (TYO) : Joko küm talangka voter-temi pei constituency nung aiba candidate-tem mengudang aser parnok ola mangashidang election atemer, anungji tang nungibo nübortemi pei candidate jak angutsü aser parnok o angadanger külenang pei  mulungba candidate nem pei vote agütsütsü maongka ngudaktsütsü asoshi election timi agidaktsütsü meranger, ta LKM Clean Election Campaign Committee ajanga metetdaktsüogo.
Tanü Honibar nü yangi Press Point Dimapur nung osangbenertem den sensaksemdang, LKM CECC purtemi ashiba agi, nübortem nem yimsüsür shimtsü agütsüba tashi (power) aser tementen (rights) tajungba angatetdaktsütsü aser election nung vote agütsüba ya temenen mapa amato mebilemi polling anogo nung nisung ajak vote agütsüi aotsü asoshi ajungshiteptsü.
Langpangkong Kaketshir Mungdang (LKM) ajanga shimba Clean Election Campaign Committee purtemi ashiba agi, joko nübortemi election timi aginür aser pei vote peii enoktsüner, anungji iba temeten aser maongkaji atalokdaktsütsüla. Ibai tanüla aser tangatetba agi raratsüba tongpang lir, anungji Arogo aser yimten lenirtem den külem ser sarasadema inyaktsü ta parnokisa metetdaktsü.
Komala yimsüsür ka shimtsüla ta jembidang, nübortem tenüng nung tatar senden nung shilem agia inyaktsüba yimsüsürji Tsüngrem akümtsübuba, nübor aser alima meimba, senden nung pei bilemba tebang agi jembitetba aser sobaliba metetba nisung ka asütsü tim ta LKM CECC purtemisa metetdaktsü.
Langpangkong nung taruba election nungibo senso ajaki ochishia pei vote enoktsütsü aser pei vote mayoktsü asoshi tenangzükba agiba sentong ka tan September 3, 2016 anogo nung to Chuchuyimlang town nung Langpangkong kübok aliba yimtsüng aser Arogo ajak nungi tatar yimsüsür, sannüker aser Arogo nung lenirtemi anir lokti aser kaketshir telongjem lenirtem adenshia agiogo.
Iba lokti senden nung lemtetba pangzüng 13 rongnung kaji, taruba election mapang constituency shia nung candidate-tem külemi jaoka lokti senden nung jembidaktsütsü aser election temer külen nübortem asoshi ochishia aser temulung agüja inyaktsü ken o kar idangjisa yimjak nung tezüluba nung nangzükdaktsütsü ta lemteta yuogo.
Item telemtetbatem mapa küma inyaktsü asoshi yimtsüng aser town shia nung LKM CECC shimtsü aser iba committee nung yimten aser arogo lenirtem adentsü.
“Nübortemi pei candidate metettsüla, angutsüla aser angadanger külenang telemtetba agitsüla aser ochishia pei vote peii enoktsüla,” ta LKM CECC purtemisa nenshia metetdaktsü.