Candidate shimtsü asoshi Manipur CM Delhi nung lir

Imphal, January 11 (Agencies): Congress nung temaba lenir ajurua taruba election nung tokteptsüpur candidate shimtettsü asoshi Manipur Chief Minister, Okram Ibobi Singh Mongulbarnü New Delhi-i ogo.
Candidate tejangrar nisung 80 dak temai party office nungi application form agizükogo aser application form ji January 25 tashi agütsütettsü, ta Manipur Congress lenir kati ashi.
Ibobi kinungtsü Landhoni Devi indang Thoubal district kübok Khangabok constituency nungi lar jabaso Okram Surajkumar-i tokteptsü.
Tang tesüsa tentetba election campaign committee nung mendenbuba, Ibobi-i New Delhi nung Congress convention nung adentsü tebilemba lir, ta Congress lenirisa shisem.
State nung menden aika nung party aika nungi tokteptsü, saka iba election ya tongtipangsa BJP aser Congress na tsüngda tokteptsü lir aser Congress-i kümsük pezübuba akoktsü imlar.
Congress campaign nung lenir Ibobi-i party nung inyakertem dang state sorkari inyaktetba mapatem shiyutsü atema shia liasü.
United Naga Council (UNC)-i longkak aitba ajanga election campaign nung timtem ajurutsü südi, ta political party aikati bilemer.
UNC-i ayonga lenmang mokdangba tenzüker Mongulbarnü anogo 70 jungogo aser iba ajanga chiyongtsü aser tang nüngdak osettsüset agi kanga anüngtepba mapang ka lir.
UNC indang teyaritepertemi Manipur nung Naga nunger aliba tesemtem nung sorkar inyakyim nung kanga meinprong asür. Hombar aonung mejangjaba nisung kar-i Tamenglong Deputy Commissioner office nung petrol bomb mereplokja rongdoktsütsü merang, saka mokoktet.
Manipur nung election junga agitettsü asoshi, hill district tem nung UNC ajanga longkak aitba ya tekaratiba nung bentettsü asoshi Centre aser state sorkar dang Janata Dal (United), Aam Aadmi Party, janata Dal (Secular) aser Manipur Democratic People’s Front ajanga ajungshiba osang ka sangoktsüogo.