Cape Town nung tzü akonger

Cape Town, Jan 17 (Agencies) : South Africa lima Cape Town nung tzünglu maruba ajanga yimti kanga dang takong kümogo aser yamai dang ora April ita nungibo tajemtsü tzü mangutsü ta kanga dang arendaka bilemdagi.
Osang ajanga ashiba agi, iba yimti ya bendang linüktem nungi nisung aikati semdanger; küm noklang ka tsüngda otsü asütsüsa tan yabo tzü agi kanga dang nüburtem timtemdagi.
April 22 tashi nungbo pipe nung tzü akongtsü ta temulung malem bilema tang ketdangsertemi ali telunglen talangka perepa lur tzü atsütettsü asoshi merangtepdagi ta angazüker.
Kümshi raliwalir million ana dak temai Cape Town semdanger aser iba mapang parnok aika tzükümlen lisem-ma nung anü wanga kazüteper; ano karbo arem sema alima tobur ajungba repranga jajar.
“Tang amai dang ora April 22 nü tashi nungjibo tzü mangutsü,” ta Cape Town tzü reprangba mayoral committee nung councilor Xanthea Limberg-i metetdaktsü.
“Tzü atema nüburtemji tarensena nokdaker atateptsü amai bilemer,” ta paisa ashi. Ketdangsertemi ashiba agi, anogoshia nisung shia atema teimba agi tzü litre 25 dang agütsütsü.
“Yimti nung takar aika dang lir aser karbo pei jurila tzü awadak yanglua lir saka tzü khenyongi mekongsepdaktsütsü atema nüburtemi tzü meyaka amshitsü merangdagi,” ta five-star Belmond Mount Nelson hotel nung otongdatsür Gabrielle Bolton-i metetdaktsü.