Captain nungi Lenir

Pakistan nung tawa agiba election nung tamalen Pakistan nunger cricket asayar nüngtugu, Imran Khan-i aniba party, Pakistan Tehreek-e-Insaf (PTI)-i takok tulu nguogo. Par party-i menden 116 nung takok angu, aser ibaji simple majority (menden 137) tera agi dang matoksaba liasü. Pa yimtenren nung ajemokba sülen küm 22buba nung pa Pakistan Ato kilonser atema tenangzükba agitsü. Ajisüaka pa atema jenjang majung kaji, pa yimsüsüba menden nung kümsük abensaa amentsü atema pai mapang ajak nung teloktep party tem den tesendaktep junga ayutsüla. Ano pai angatettsü kaji, cricket asayaba moapu nung Umpire dak tashi aliba mesüka Pakistan yimtenren nungbo Army ji Umpire amai asutsü. 1999 küm yimsü tesüdak mapang October ita nung Pakistan sepaitemi Nawaz Sharif Ato Kilonser menden nungi atsüngdokba sülen küm 14buba nung ano kasa yimten yimsüsüba menden nung amentsüsa maongka angubaji Nawaz Sharif-i aniba Pakistan Muslim League (PML-N) telok liasü. Atangji, PML-N telok dak alaka election nung tangar teloki takok junga mengutet, ajisüaka parnok ajak asoshi takok kaji Pakistan nung nüburi election ajanga shimtetba yimten telok kati kümsük shitak abensaa yimsü sür ano party ka nem timi melenoktsütetba liasü, kechiyong Pakistan nung sepaitemi kodanga nüburtemi election ajanga shimtetba sorkar nem kümsük abensaa yimsü mesüdaktsüi tashi amshia aru. Aji oda, Pakistan sepaitem madak tulutiba Gen. Pervez Musharraf-i Nawaz Sharif atsüngdoker yimsü asüba sülen asür, Benazir Bhutto’er telok Pakistan Peoples’ Party (PPP) nung Tir, Asif Ali Zardari-i yimsü asü. 2013 küm Pakistan Parliamentary election nung shilem agitsü asoshi Pervez Musharraf bendanglen jenoka aliba meyipa aru, saka okadak aija sepaitemi pa puoka ayuba ajanga pa tebilemba matalok. Atangji, sepaitemi nüburtemi shimtetba sorkar agienbaji ochimashi mapa anema inyakba mapa ka liasü, ajisüaka sepaitemia ochishia yimsü mesütet, iba jagi nüburtemi parnok nem yimsüsütsü maongka magütsü ta rajemer. Aji oda nüburi shimtetba sorkari tanabenbuba yimsü asüdang, Pakistan nungeri mulungba nung terenlok aliba linüktem den kasa renloka aotsü teimla nung Nawaz Sharif-i tashi tulu aliba linük US aser kidanger linük India den tesendaktep junga ayutsü atema inyaka aruogo. Imran Khan cricket captain asüba mapang 1992 küm Pakistan-i Cricket World Cup takok ngua liasü, aser tangbo pa Pakistan nunger cricket captain masü saka yimten khuret tulu benzüka Pakistan Ato kilonser akümtsü. Par party teloktep party tem dak metaloka lir, anungji pa dak kijai yimsüsüba shisatsü pai azüoktsüsa akumtsü. Pakistan nunger kidanger linüktem aser alima nung tashi aliba linüktem den asalentongji Army dak keta lir, anungji tanbo Khan yimtenren nung captain süaka tenüng agi dang asütsü südi ta bilemer. Pakistan lima ya mepetmesü kanga aliba linük ka, aser kiralongrartemi amokbanger aliba lima ka lir, ibayongji alima sabang nung par linük tenüng kanga menükogo. Iba ama tensa ka nung Khan atema tongti teinyaktsüji, külen yimjung bushitsü saka iba denji külemi linük nung timtem agütsürtem anema sashia inyaktsüsa akümtsü. Pakistan nung kiralongrartem anema inyakba den külemi yimjung lia Khan-i kidanger linüktem aser alima nung tashi tulu aliba linüktem den tesendaktep junga yanglutetra par linük asentenshir renloktsü.