CAR-i linük temzüng tasen latetshir

Bangui, December 22 (Agencies): Nübürtemi vote agüja shilem agiba sülen Central African Republic (CAR) linüki linük temzüng tasen latetshiogo.

Taoba küm 3 tejaklen nungi tenzüka par linük adokba yimtenren mangatettepbaren agientsü nükjidong nung CAR linüki tan linük temzüng tasenji latetshir lir.

Tan linük temzüng tasen latetshitsü sentong nung vote agüja shilem agir nübur noklang shilem nung shilem 93 shi linük temzüng latetshitsü mulunga aliba osang bushitetogo ta CAR election ketdangsertemi metetdaktsü.

Ajisüaka, tan December ita 13 nü agiba linük temzüng melenshitsü den sentakba vote agütsütsü sentong nung nübur noklang nung shilem 38-i dang shilem agia liasü ta parnoki ashi.

Tan linük temzüng latetshiba sülen CAR Tir kati linük yimsüsütsü tashi kümsük 5 asoshi anabenren dang abentsü temeten agütsüba den külemi, mitkar nem agütsüba tashi ajemja nübur nem tamangba yimsü den sentakba temeten taoba mapang nungi tuluba agütsüogo.

Ano, election aginüa Bangui yimtiba nung linük temzüng melenshitsü onük pusemer aser kasaji anemer telok na tsüngda injang yoktepa raraba ajanga nisung 5 tashi injang agi kasetba aser nisung 20 shi yiruba osang bushitetba osang ka Red Cross telokia metetdaktsüogo.

United Nations (UN) ketdangsertemi songtemba sülen ang raratepbaji anena tensa azüoka liasü.

Tan December ita 27 nü linük election agiba jakdang CAR linüki par linük tasenbaji lateta agizüker lir.

Muslim Seleka sorkar anemertemi Francois Bozize CAR Tir menden nungi tashiyim agi atsüngoka linük yimsüsütsü tashi mapang tatsüka asoshi benokba sülen CAR nübur meyirijang jenti tepsetba den külemi, nübur meyirijang jenti pei talidak melitettsüsa akümba osanga bushiteta lir.

Yamaji tensa mejungi akümtsü tenzükba sülen Christian tamangba yimsü benshirtemi tongpang nung amshitsü osettsüset bena arua sorkar anemertem den raratsü tenzükba sülen tang Christian aser Muslim nisungtem na tsüngda tongpang raratsü tenzüka lir.

Aji oda, tensa azüoktsü mechi UN-i par mitkar telok ka tang CAR nung yuja lir aser par linük yimjung nung alitsü ajungmesotsü nükjidong nung Roman Catholic tamangba yimsü lenisang, Pope Francis-ia taoba November ita CAR semdangogo.

Tesüiba mapang, 1960 nung France yimli nungi nüchiso angua sülen nütsüng yongsük million 5 shi aliba CAR linüki mapang shia tensa tamajung ajurua lir.