Carolina Marin-i 2015 Female Player of the Year sempet agizükogo

Dubai, December 08 (Agencies): Tang tetsür badminton asayar tarensen nung World No. 1 jenjang abenla, Spain tsür, Carolina Marin-i China tsür ana – Zhao Yunlei o Bao Yixin na aser India tsür, Saina Nehwal nunger den temaba jenjang ngua 2015 Female Player of the Year sempet yasüng Hombar aonung agizükogo.
Carolina-i 2014 aser 2015 Badminton World Federation (BWF) World Championships takok marok atonga agizükba den külemi, taküm 2015 küm tenzüker tanü tashi nung World Superseries takok marok 5 tashi agizüka lir.
Tan December ita 9-13 nü tashi asayatsü ayongba Dubai Superseries Finals asayamong nung shilem agir asayartem asoshi United Arab Emirates (UAE) kübok Dubai yimti nung ayongba asayar pela agizükba aser chiyongtepba sentong nung BWF Tir, Poul-Erik Hoyer-i Carolina nem iba sempetji agüja liasü.
“Zhao-i iba sempet ya agizüktsü ta bilema liasü kechiyong lai taküm küm piyong takok tulu ngua shilem agia liasü,” ta Carolina-i yasüng sempet agizükdang metetdaktsü.
“Kü nem iba nungtugu sempet agütsüba atema kanga pelar kechiyong iba sempet agizükba ajanga ni taküm junga shilem agi ta kuli sayur,” ta lai ashi.
China nunger Chen Long-ia 2015 Male Player of the Year sempet agizükba osang jangjaogo.
Chen-i yaküm 2014 küma kasa sempet ya agizüka tan agi Male Player of the Year sempet 2 ben tashi atonga agizüker lir.
Külem sensopur, Zheng Si Wei-ia 2015 Most Promising Player of the Year agizükba den külemi, Korea nunger Lee Sam Seop aser Norway tsür, Helle Sofie Sagoy nati tebur aser tetsür na shilem indang Para-Badminton Player of the Year sempet agizüka liasü.