Dimapur, February 09 (TYO) : Dimapur nung aliba lanur telok kati Dimapur nung football league asayamung ka tenzüktsü sentong renemogo. Football ajanga temang yakyaka alitsü aser tembar yimtettsü nükjidong nung iba asayamung ya ayonger. Register süa maliba football league asayamung dang ya, CASE Premier League ta ajatsü aser iba asayamung nung football asayar mongin masüba telok, arishi küm 30 sür tekadangpur angutsü.
Telok kari azünga aliba mapang temang yakyaka alitsü mechi friendly match asaya tenzükba sülen iba asayamung tenzüka asayatsü jenjang tashi tongtet.
Iba league asaya tenzükba sülen joko tang nungi telok balalai international football asaya nung amshiba temzüng ozüngtem amshia asayatsü.
CASE Premier League ya “Beyond Friendship, Beyond Fitness & Beyond Football” omen nung ajemdaker asayatsü aser iba asayamung asayatsü asoshi training agidang pei kiyong mesüra kisalen ball asayaba ajanga lanurtem aser mapa inyakertem tsüngda tesendaktep tali tashi taitba akümtsü.
Mezüngbuba CASE Premier League nung telok pungui shilem agitsü aser itemji STAFAC FC, Hyderabad Nizams, Trinity Sporting, Team HHH aser CASE FC teloktem lir.
STAFAC FC telok nung ajaki jangja aliba Patkai Christian College nung tesüiba mapang zünga alirtem lir aser Hyderabad Nizams telok nung taoba mapang Hyderabad nung külemi zünga alirtem lir.
Ano Trinity Sporting telok ya Padumpukhri nungi aser Team HHH nung DABA executive tem, züngsemtem aser Khristan Ministry nung medemertem lir. CASE FC nung tamalen nungi football külemi asaya arurtem dena lir.
Iba asayamung ya February 11, 2017 nü nungi Patkai Christian College Football Ground nung tenzüka asayatsü. Iba sülen Christian Institute of Health Science & Research (Referral Hospital) moapu nung asayatsü. Iba league asaya ya ita ana shi asayatsü sentong lir.
Shishilembar, doctor, sorkar mapa inyaker, tesayur aser mapa balala inyakertem pei wadang nung tamakok maludaktsütsü mechi nung iba league asaya ya Honibar anogotem nungang asayatsü.
Iba asayamung nung takok anguba telok nem marok ang ka agütsütsü, ajisüaka iba marok ya lungjemdaktsüba, kodanga makoktsü amai mebilemba, arishi küm agi nü taküm nung inyaknüba menokdangtetba aser akhümtsübu agi sünga lir, ta asayamung ayongertemi ashi.
You must be logged in to post a comment Login