Castro-i UN General Assembly senden nung shilem agitsü

United Nations, September 16 (Agencies): Cuba Tir, Raul Castro-i United States (US) kübok New York yimti nung tan September ita amentsü ayongba United Nations General Assembly (UNGA) nung shilem agitsü sentong renemba osang ka UN-i tanü Bodbar nü metetdaktsüogo.

Castro-i tan US semdangtsü sentong atongba ya pai Cuba lenisang menden benokba sülen tan mezüngsüa US semdanger alitsü.

Aji oda, Castro-i tan September ita 28 nüji UNGA senden nung o jembia shilem agitsü renemer lir.

Kasa anogo nung US Tir, Barack Obama den külemi, Russia, China aser Iran nung Tir menden abenertemia o jembia senden nung shilem agitsü sentong renemba osang jangjaogo.

Ajisüaka, Castro o Obama nati tan September ita 25 nü nungi taruba October ita 3 nü tashi amentsü ayongba UNGA senden tezülen ajurutepa jurila senden amentsü asü mamentsü iba osang tejangjabo White House aser Cuba sorkar napronglai tanü tashi metetdakja mali.

2008 küm Cuba Tir akümba sülen tan mezüngsüa US semdangtsü sentong renemsang, arishi küm 84 tain Castro-i tanü tashi nung US ken dang semdanga aliba osang jangjaogo.

US o Cuba na tsüngda küm 50 dak tema tesendaktep mejungi lir külen, Castro o Obama nati yaküm 2014 küm December ita 17 nü tsüngdong ajurutepa par linük ana tsüngda tesendaktep tanaben tajungba küma yanglushitsü jembitepba ajanga alima ajunga aoksadakja liasü.