Cat Deeley-i la mashisa akümba metetdaktsüogo

September 04, 2015: Cat Deeley aser kinüngbo Patrick Kielty nati Brihostibar nü tena tanur mezüngbuba benlokogo aser 2016 küm tetenzüklen asotsü, ta metetdaktsüogo.

‘So You Think You Can Dance?’ nung ketdangser, arishi küm 38 tain, Cat Deeley aser kinüngbo Patrick Kielty na ya 2012 küm kibong aküm aser tenati, iba osang tajung kanga pelaseta lemsateper, ta ashi.

Deeley-i, “Tepelatsü osang ka…..Paddy küna mezüng tanur sangküm küm tetenzülen asotsü aliba osang kanga pelaseta lemsateper…..küna kanga tia taka lir,” ta Brihostibar nü twitter ajanga lemsatepa liasü.

Cat aser Patrick na ya küm asem tejakdang Rome nung mima oa kibong aküm saka la sülen social media nung anishir nisung 354,00 den, külem inyaker Arlene Philips nunger nungi la kibong akümba tepela osang lemsatepa liasü.

Comedian Kielty-i aser Cat na 2002 küm ‘Fame Academy’ sentong nung külemi shilem agiba mapang mezüng ajurutepa liasü. Ajurutepli nungi tena sakloktepa aküm ajisüaka küm 10 tema shi medemer amadang liyonga aruba sülen ang 2012 küm nüburtemi meteta aküm.

“Küna tsüngda nung temeim terabo liasü aser künaprong shinga dena memedemi liasü saka kibong maküm tashi küna yimti balala nung liasü,” ta Kielty sapoka ashi.

Britain nung 1998 küm Ant & Dec den külemi ‘SMTV Live’ ajanga ‘CD:UK’ ken sentong host asüba mapang nungi nüburtemi Deeley kanga jangja meteta aküm. Iba sülen 2006 küm nungi America nung la ‘So You Think You Can Dance?’ nung adentsü tenzük. Anungji kinüngbo tena achinütepa liaka Kielty mapa London nung aliba ajanga dena linük balala nung timba liasü.

2006 küm nungibo Deeley-i TV show ‘Life’s Too Short’ aser ‘The Simpsons’ tem den ano tanga show aika nung shilem agia arur. Iba den külemi Prince William aser Kate Middleton na kiyimba sentong nunga CNN osang atema lai shilem agiogo.