Catalan lenir chioktsü akhanger

Barcelona, October 18 (Agencies): Ashikülakba ken o nung aija apuba nisung ana ya chiyokang, ta akhangtsü asoshi Barcelona yimdong nung nisung 200,000 dak tali adenshia jaja aser nisung ana pua aliba ya ‘political prisoner’ ama lir, ta züngshir.
“Sanchez aser Cuixart-na asoshi nüchiso!” ta ayimdena longkak aitertemi Omnium Cultural indang Jordi Cuixart aser National Catalan Asembly (ANC) nungi Jordi Sanchez na chiyoktsü asoshi takhangba agütsü. Tena ya ashikülak mapa inyakba ken o nung linük sadangtsütsü merang, ta aija Hombarnü Madrid nung tepuokdaki yok.
Mongulbarnü menur nisung 200,000 yimdong nung jajaba ya October ita tetenzüklen Catalan nungertemi vote agütsütsü temeden wazüka ayutsü asoshi tentetba, Committees for the Defense of the Referendum (CDR) teyari ajanga ayongzük, ta CDR ketdangser Anna Martinez-i ashi.
Iba rally ya Mongulbar tenzük aser nisung ya block shia renloka ao.
Iba sentong nung shilem agirtemi Cuixart aser Sanchez na atema minute pongu ola madoki mokrema ali aser nisung kati “Nüchiso!” ta ayimoktsü aser nisung 200,000-i iba yimyim langzüa ayimden.
Nisung ana apuba ya tang Spain yimden nung ruling right-wing Popular Party (PP)-i pelashishia agizük.
Catalan lenir tepuokdaki yokba ya Spain indang obendangba bangdak shidak lir, ta sayuteter aser tepuokdak indang sentongbo onoki jembitettsü saka political prisoner atemabo mejembitettsü, ta Spain Justice Minister Rafael Catala-i ashi.
Catalan nüchiso asoshi October 1 nung vote agiba mapang Omnium aser ANC-i nungita yari.
Cuixart aser Sanchez na tepuokdak ayuba ajanga tang Spain yimden nung teraksa adoka aliba tensa tamajungba kümdaktsür.
October 1 nung Catalan referendum ya ozüng alema inyaker, ta Spanish constitutional court ajanga aitsü aser vote agütsürtem nokdangtsü asoshi police nem totuyuba agütsü.
Saka Spanish National Police aser Civil Guard temi vote agütsüba nokdangba mapang tashiyim amshi, ta nüburtemi ashir.