Catalan sorkar anentsütsü: Spain Prime Minister

Madrid, October 21 (Agencies): Spain sorkari Honibarnü Catalonia nung lennirtem anentsütsü aser election tasen agishitsü atema telemtetba agi.
Iba sentongji Senate upper house-i agizüktsüla aser iba ajanga tesüiba küm 40 tashi yimtenren mapa anokshia aruba angatetteptsü meranger, saka nüjiso pusemertemi iba tebilemba magizüker.
Prime Minister Mariano Rajoy-i cabinet telemtetba osang metetdaktsüdang, Catalan rongsenkettsüngji linük nung jenjang pungububa lir aser Catalonia nung sorkari nüjiso atema inyakba ajanga jenjang tamajung ka nung lir, ta ashi.
“Onoki Senate dang asüngdangtsü. Onoki linük taginüba kümzüka ayutsü tangatetba nung sorkar nem Catalan president aser par sorkar anentsütsü atema tashi meshitsü” ta Rajoy-i osangbener senden ka nung ashi.
1970s tatemlen ka Spain nung democracy benokba sülen centre sorkari region ka madak ketdangsütsü tashi meshibaji tang mezüngbuba lir.
Iba inyakyim kübok Catalonia region indang police, finances aser public media dena lir aser regional parliament indang tashitema azüoktsü.
Pai ‘special powers’ ji ita trok dak tali mamshitsü saka tensa süngjema akümba sülen regional election jazüktsü, ta Spain prime minister Rajoy-isa metetdaktsü.
“Onoki sensosangertem rongnung amalitep adokdaktsünür aser tensa süngjemdaktsütsü bilemer. Tanü Catalonia nung tensa mejungi lir aser lendong ajurutsü ana nungdang lir. Iba jagi onoki elections agia tensa tajungba kümdaktsütsü bilemer” ta paisa shisem.
Tanü Cabinet-i lemtetba onükji Spain upper house- Senate-i agizüktsüla aser iba atema October 27 nü vote agiteptsü sentong lir.