Catalonia parliament nung Spain nungi nüchiso sangdongogo

Barcelona, October 27 (Agencies): Spain sorkari indang indanga yimsü asütsü renemba mapang Catalan regional parliament nung Spain nungi nüchiso agitsü asoshi vote agütsüogo.
Opposition MP temi nokdanga agütsüba ballot nung 70-10 liasü.
Catalonia nung temzüng ozüng, democracy aser temelenshi arutsü asoshi senator temi indang indanga yimsü asütsüla, ta Spain Ato Kelonser Mariano Rajoy-i tamale nungi shia arur.
October 1 nung mangatettep aketba vote agütsüba nung Catalonia nunger temi Spain nungi nüchiso agitsü asoshi vote agütsüba sülen Spain nung rongronga aser azüdokshia arur.
Catalonia nütsüng shilem 43-i vote agütsüba nung shilem 90-i nüchiso busema agütsü, ta Catalan sorkari ashi. Saka iba vote ya ozüng alema lir, ta Spain indang Constitutional Court ajanga obendang agütsü.
Catalan regional parliament nung nüchiso sangdongba ya züngsem 135 nungi züngsem 70-i nüchiso busema vote agütsü, züngsem 10-i memolung aser züngsem ana meliasü.
Iba osang sangdongba sülen Rajoy-i Spain nunger dang süngjema alitsü ajungshi aser Catalonia nung temzüng agi melaba ama inyaktsü nangzük.
Spain Senate nung Spanish linük temzüng Article 155 ya amshitsü asoshi vote anu magitepi lir, aser iba temzüng ajanga Spain tesem mashi nung melangmepu adokba mapang sorkari tashi ajunga amshitsü mela lir.
Iba temzüng ya amshira Madrid ajanga Catalan lenir ajunga mapa nungi anendaktsütsü aser iba region indang rongsenketsüng, police aser public media ajunga Spain sorkar küboki aittsü.