New Delhi, October 16 (Agencies): Nija kati tanur ka ‘adopt’ (pei chir ama agitsü) asütsü melaba nung sorkari latetbatem Catholic Bishop’s Conference of India (CBCI)-i aitsüogo.
Mother Teresa’s Missionaries of Charity-i parnok indang orphanage tem nungi tanur adopt mesüdaktsütsü ta noktakba nung CBCI-ia pusemer.
CBCI-i, item telatetbatemji ajanga junga yangerteter aliba aser Mother Teresa-i benokba anemer, ta ashi.
“Kija tsürabur ka dang tanur adopt asütsü melatsüji magizüktettsü inyakyim ka lir, kechiyong iba nungji adopt asüba tanurtem atema timtem aika lir aser adoption nükjidong raksatsür. Ano, tanur ka shimtsü atema adopt asütsüsang dangji tanur trok sayutsüla ta tuyubaji magizüktettsüsa lir,” ta CBCI-i ashi.
“Iba ya tanurtemji osettsüset ka shimba mesüka kümdaktsür aser tanurtem akhüm anema lir,” ta parnok official sangdong ajanga ashi.
“Missionary Sisters of Charity-i, adoption Centre maneni lapoktsüji parnok atema tasak asütsü ta benokba nungji CBCI-ia pusemer, kechiyong telatetba tasen kar ajanga junga amenoka aliba aser agizükteta aliba anemer,” ta kasa sangdong ajanga ashi.
Mother Teresa’s Missionaries of Charity-i tanurtem adopt asütsü atema magütsütsü ta noktakba mapang ka nung tan hopta tetenzüklen Women & Child Development Ministry-i, adopt asüba den sentaktepa aliba childcare institution ajaki item tasen telatetbatemji benshitsüla ta metetdakja liasü.
Osang ajanga angazükba agi, Mother Teresa’s Missionaries of Charity-i kija tsürabur, tebur o tebur na mesüra tetsür o tetsür na shi nung medemer tem nem tanur adopt mesüdaktsütsü lateta lir.
You must be logged in to post a comment Login