Cazeneuve France PM tasenba akümer

Paris, December 07 (Agencies): France Ato Kilonser tasenba inyakdaktsütsü atema France Tir, Francois Hollande-i par Interior Minister, Bernard Cazeneuve tanü, Mongolbar nü shimogo.
Taruba 2017 küm May ita agitsü ayongba Tir election nung candidate ka ama tokteptsü nükjidong nung Manuel Valls-i Ato Kilonser menden toktsüba sülen pa melenzüka, election tembanga magi tashi Ato Kilonser menden abentsü atema Cazeneuve shimer lir.
2014 küm April ita nungi tenzüka, minister menden abensang, Cazeneuve-i Islamist kiralongrar anema raratsüren nung tongti shilem agiba den taoba 2015 küm January ita nung Islamist kiralongrartemi Paris yimtiba nung nisung 230 dak tema tepseta lendong kanga sashia atalokdaktsüba sülen par France nung emergency ozüng benokba maparen takok ngudaktsütsü atema Cazeneuve-i bendanga agüja inyakba osang bushiteta lir.
Arishi küm 53 tain Cazeneuve-i taoba mapang France Budget Minister aser Europe jenjang nunga minister menden bena aru.
Cazeneuve melenzüka, Interior Minister menden abentsü atema Hollande-isa Bruno le Roux shimba osang angazükogo.
Hollande-i tanabenren Tir menden abentsü atema election nung candidate ama metokteptsü lemtetba osang taoba hopta sangoktsüba sülen pa melenzüka, France Tir tasenba akümtsü nükjidong nung arishi küm 54 tain Valls-i Tir election nung candidate ama shilem agitsü atema tenüng benokogo.
Valls-i taruba 2017 küm January ita agitsü ayong Socialist yimtenren telok’er primary sentong nung takok ngura, pai April aser May ita na agitsü renemba election nung Republican Party telok nungi Tir menden atema toktepsang, tesüiba France Ato Kilonser, arishi küm 62 tain Francois Fillon den tokteptsü temeten angutsü.
Fillon-ia taoba hopta par yimtenren telok nungi Tir candidate ama election nung tokteptsü temeten ngua liasü.