CB Trophy: Gujarat & A&A Team na tsüngda asaya tenzükogo

Nagaland nung mezüngsüa national jenjang nung ayongba CB Trophy asaymong tetenzükba sentong nung MP & NCA President, Neiphiu Rio, state ketdangser, BCCI lenirtem aser Gujarat o A&A Team asayartemi agiba arok noksa ka yangi angur. (Dimapur, November 14)

Dimapur, November 14 (TYO): Gujarat Under-19 (U-19) telok aser Meghalaya, Arunachal, Sikkim, Manipur, Nagaland aser Bihar nungi asayartem densemba Associate & Affiliate (A&A) Team na tsüngda otsüsütsüsa national jenjang nung ayongba Cooch Behar Trophy asayamong asaya asayatsü tenzükogo.
Tanü, Hombar nü asayaba mezüngbuba asaya anogo nung Gujarat teloki toss koka, mezüng batting asütsütsü lemtet aser par teloki overs 91 nung wicket 3 tashi laoa, ajak agi runs 294 tashi agia liasü.
Tan asaya nung Andra Pradesh nungi P Bhanuprakash aser Haryana nungi Dharmesh Bharadwaj na Umpire aser Goa nungi Uday Naik Match Referee aliba osang angazükogo.
Board of Control for Cricket in India (BCCI) nungi pitches & grounds ludeni tendanga agizükba sülen, Nagaland Cricket Association (NCA)-i tan mezüngsüa Dimapur kübok Sovima nung tentetba Nagaland Cricket Stadium (NCS) nung BCCI jenjang nung cricket asayamong ayonga asayar lir.
BCCI Tir, Anurag Thakur aser BCCI kübok New Area Development Committee (NADC) nung mendenbuba, Abhishek Dalmiya natia Nagaland semdanga, NCS asayadak national jenjang nung cricket ayonga asayatsü temsü asü metemsü reprangshia tendangba sülen NCS BCCI asayatem asayadak asoshi shimba asayadak tarensen nung enoksemba osang jangjaogo.
India linük kübok BCCI-i shimba asayadak balala nung asaya 6 tashi asayatsü renemba Cooch Behar Trophy asayamong nung A&A Team tenüng nung asayatsü asoshi Nagaland nungia asayar 4 tashi shima lir.
A&A Team-i Saurashtra, Hyderabad, Jarkhand, Karnataka aser Madhya Pradesh teloktem den asayatsü lemzüka lir.
“Nagaland state aser NCA tenüng nung BCCI aser BCCI Tir, Anurag dang pelaba lemsateper. North East region nung cricket jenjang tajungba kümdaktsütsü atema BCCI ajungshir aser NCA-ia BCCI maneni pusema nungitsü nangzüker,” ta asayamong tenzükba sentong nung tongti tesemdanger, Nagaland nungi Lok Sabha MP & North East Cricket Development Committee nung mendenbuba, Neiphiu Rio-i metetdaktsü.
“Nagaland nung tan mezüngsüa national jenjang nung cricket asaya ayonga asayatsü maognka anguba atema kanga pelar. Nagaland-a joko India jenjang nung cricket asayar aser tanga state ama tongti shilem agir state ka kümogo,” ta NCA nung Secretary, Abu Metha-ia lemsatepa liasü.
BCCI temzüng ozüngi melaba ama inyaka, tan asaya tendanga ketdang asütsü atema taoba first class aser Ranji cricket asayar, Match Refeee, Uday Naik-i aniba tongti BCCI ketdangsertem Dimapur nung anenzüka aliba osang angazükogo.
Tan asaya ya video analyst telok aser asaya BCCI website nung maloktsür telok nati asaya den sentakba video-a agitsü tenzüka lir.
Coaches, trainers, physiotherapist, video analyst aser manager densema, tongti cricket ketdangsertemi A&A Team acha ayangba osanga angazükogo.
A&A Team’er asaya lemzükba tarensen yamai lir:
* Nov 14 – 17 : Vs Gujarat at Dimapur
* Nov 21-24 : Vs Saurashtra at Rajkot
* Nov 28 to Dec 1: Vs Hyderabad at Hyderabad
* Dec 5-8 : Vs Jharkhand at Patna
* Dec 12 – 15 : Vs Karnataka at Bangalore
* Dec 19 -22 : Vs Madhya Pradesh at NE