CBCMHK-i Team Tea for Mission tenzük

Kohima, March 02 (TYO): International Mission Committee (IMC)-i ketdangsüa tawa (February 29) Chakhesang Baptist Church Council (CBCC) kübok Chakhesang Mission Society (CMS)-i “Team Tea For Mission” (TTFM) ta ser pilot mission project ka tenzükogo; iba mission project ya Chakhesang Baptist Church Ministers’ Hill, Kohima (CBCMHK) nung CBCC Executive Secretary, Rev. Khrotso Mero-i tenzükja liasü.
Media & Publicity Committee, CBCMHK-i sangdong ka ajanga, “Team Tea For Mission” nükjidong ya Khrista osangtajung nüngdakba limatem dangi missionary 10,000 yoktsü alizüng atongtsü aser ‘Land of Festivals’ agi ‘Land of Missionaries’ melentsü atema lir, ta metetdaktsü.
Okila jembidang IMC Chairman, Kudecho Khamo-i, mission mapatem atema TTFM ya business project ka lir, aser iba ya ajanga tamanger ajak tajaba atalokja alima atema metsü aser tesangwa kümdaktsütsü, koba ajanga loktiliba ajak nung Khrista osangtajung ajanga tashi agütsütsü, ta metetdaktsü.
Iba project tenzüktsüdang Executive Secretary CBCC, Rev. Khrotso Mero-i Mission team züngsemtem dang, nüburtem asoshi aser Tsüngrem yimli sentsüwangshidaktsütsü atema iba project inyaktsü mepishia metetdaktsü.
Mero-isa, Mission mapatongtem atema longjemer inyaktsü nüngdaker, ta ashiba den külemi Yisu dak rangloker iba project nükjidong ataloktsüsa inyaktsü ayongzük.
Paisa, “Alima tesem aika nung nüburtemi Khrista osangtajung atema tzürar, aser iba atemaji asenoki sadoksadoka aliba taküm yutsür osangtajung mangashibapurtem ayimjemtsü nüngdak, Tsüngremn yimli sentsüngwashi atema tayongzükba ajak koktettsü atema züngsemtemi renema alitsüla,” ta metetdaktsü.
Iba sentong ya CMS Chairman, Rev. Dr. Kedungulo Mero leniba nung agi, CBCMHK Sr, Pastor, Rev. Dr. Vevo Phesao-i sarasadema sentong tenzük, IMC Chairman, Kudecho Khamo-i iba project indang metetdaktsü aser CBCK Sr. Pastor Rev. Dr. Kevekhalo Lasuh-i sarasadema sentong tembanga liasü.