CBI ajaba tetezü !

Nagaland nung mapa ajak nung ochimashi kanga lir. Ibajibo Nagaland nung tulutiba angh-ia dena anogo shia pa aolen ajak nung yimjak nung jembir. Aji oda, tulutiba nungi aluagi primary school nung azüngertemi dena Nagaland nung ochimashi mapatem indang jembir. Iba amaji kanga jembiba agi ochimashi mapaji ochitashi mapa amato ka kümadokogo. Tanü tensa asen lima nung asenok ajak asoshi tia tamajungtibaji aji asütsü. Joko, ajak ochimashir akümnungji, kari danga jakdaka yimjak nung ochimashiba indang jembira talitapong jembir amai bilemer. Aji oda, nisung ajak ochimashir akümnungji tenla kidanga ochimashiba indangbo samdemsadema sayutsüngia mesütetter.Iba ama mapang ka nung, Nagaland nung langka ochimashiba mapa ka atalokli, aji CBI nem bushidaktsütsüla ta takangba agütsüli, ochimashi mapa ka putetli ajia CBI nem bushidaktsütsüla ta asüba jagi asenoki meteta aser memeteti Nagaland nung ozüng raksar mitertem aser ochimashi inyakertem bushirtem dak temulung melemi akümba mapa agi sayur. Ibajisa tamajungba aser shisabolutsüka lir, kechiyong kodang ozüng raksartem azüoktsü ayuba aser ochimashirtem bushia merenshitsü ayuba  ketdangsertem dak temulung melemtettsüsa kümdir, iba limajibo ozüngraksartemi yimsü asütsü. Aji oda, tangari ashibajibo yutsür Nagaland governori ashiba ya jungjunga angadangra, Nagaland ya ozüng raksar aser ochimashirtemi yimsü asür ta ashirba lir. Lanurtem asoshi balaka tsüraburtemi iba ama Nagaland-ji yanglua yuja lir ta shisabolua bilemtsüsa mapa tulu lir. Tang Naga nunger tia ajung, Nagaland nung ochimashi mapa anema tasüa majem nokdaktsüba pur ACAUT telok lir. Iba teloki Nagaland nung ochimashi mapa inyakba ya jakdaka metetdaktsür aser ochimashirtem ket nungi nübortem kümzüker. Aji oda, tawa parnoki Food & Civil Supply department ajanga sensakertem nem jenjang kanga dalang agi agütsütsüba jang, wheat aser kerosene nungertem sensakertem nem magütsüi tangalen yokdokba mapatem CBI nem bushidaktsütsüla ta Nagaland angh nem takangba agütsüba nungji state sorkar dak kenyongi temulung melemtetba shisatsü tuluka angur. Atangji, Nagaland nung ochimashi mapa inyakbatem CBI nem bushidaktsütsüla ta nübortemi akangba tetetzüji state government dak temulung malemer. Aji oda, joko Naga nungertemi Nagaland police dak temulung malemer, Vigilance daka temulung malemer aser Naga nungertemi Naga nungertem dak temulung malemtsüsaba tia nung tanü Naga nungertem lir. Iba tia ya ajaki khen jungjunga meyipa reprangshir Naga nungertemi Naga nunger police aser Nagaland Vigilance dak temulung alemtsüsa khen jungjunga asentenshitsüla. Alima ka nung nübortemi police dak temulung melemtettsüsa aliba tiaji temeimtsüka aser tetsübutsüka lir. Aji oda, pei state nung aliba Vigilance purtem dak temulung melemi CBI jaoknüba jagi Nagaland nung ozüng mamshitetba tensa tia sayur. Tanga state nungbo MLA aser minister dena pua tepuokdak ayur saka asen lima nungbo iba amaji inyaktsübo kenyongi teimlaa meimlar. Aji oda, Nagaland nungbo ochimashi mapa inyaka aliba indang jembirtemang kanga akoksar aser ochimashi mapa inyaka lia pura parnokjibo tepuokdak ayur. Iba amaisa ora, tanübo junger amato saka tsümar kari Nagaland ya menakrepa menaker yutsür aodang dang asenoki asenok akoksaba metettsü. Atangji, ochimashi mapa inyakba agi melamelaa tajangzük aser takar akümer. Ajisüaka, ochimashiba len nungi akaba rongsenji senmang küma putu kata mamshitsü aser mamshitetba asenoki angur. Item nungji tan ser tanü lanurtembo mapa meranga inyaktsü, jungjunga inyaktsü aser ochishia alitsü ta nangzüker government mapai aitsüla. Tamasayongi government mapai sen agi alia maitsüla aser ochimashi mapa inyaka akatsü tebilemba nung maitsüla. Iba tangatetba aser tenangzükba nung tanü lanurtemi danga Nagaland nung anogo tasen ka tenzüktetra, idangjibo CBI ajatsü nüngdak madoktsü. Tetezü, asenok o asenok na temulung lemtepa alitsü.