CBI Bhopal aruba sülen Vyapam bushisüngdang tenzükogo

New Delhi/Bhopal, July 13 (Agencies): Madhya Pradesh Vyavsayik Pareeksha Mandal (Vyapam) ochimashi ken o aser iba dak sentakba nung nisung 40 dak tema asüba ken o bushisüngdangtsü asoshi züngsem 40-i akümba Central Bureau of Investigation (CBI) team ka tanü Bhopal tonga aruogo.

CBI team Bhopal tonga aruba sülen parnoki Madhya Pradesh police ketdangsertem aser Madhya Pradesh High Court-i shimba Special Investigating Team (SIT) den iba ken o dak sentakba nung olemtep kaogo, ta ketdangser osang ajanga ashi.

Kaket reju balala nung azüngtsü asoshi tatidang ketdangsüa agiba aser mapa balala nung shimoktsü asoshi ketdangsüba tentet, Madhya Pradesh Professional Examination Board (MPPEB) koba dang Vyapam ta ajar, iba ken o aser iba ken o dak sentakba nung nisung jenti asüba ken otem CBI nem bushisüngdangdaktsütsü asoshi tawa Supeme Court-i tetuyuba agüja liasü.

Iba ken o nung nisung 2,100 shi puogo aser tai tonglokja aliba nisung 491 shi jenshia senzüdagi.

Congress-i ashiba agi iba ken o dak sentakba nung tang tashi nung nisung 49 süogo saka SIT-i MP High Court nem agütsüba official osang ajangabo masütsü yimya nung asürtemji nisung 25 lir.

Iba ken o bushisüngdang nung CBI tongtiji, R P Agrawal asütsüa akok aser tanü pai, iba agency (CBI) ajanga linük nem tamakok malutsütsü, ta shiogo.

1986 batch Indian Police Service nungi Agrawal lenisüba nungsa taoba mapang nunga Rajasthan nung Bhanwari Devi tepsetba ken o aser Gujarat nung Sourabuddin Sheikh ken o bushisüngdanga liasü.

Agrawal lenisüba nung Delhi nung par telok züngsem 12 tanü Bhopal nung aliba Raja Bhoj airport tonga aruba sülen osangbenertem den jembidang pai, “CBI-i linük nem tamakok bener marutsütsü. Iba ken o ya ochiba nung bushisüngdanga ochi jungkai adoktsütsü,” ta ashi.

Supreme court tetuyuba nung tang onok Bhopal tonga aruogo, ta paisa ashi.

CBI anti-corruption wing nung sangküm January ita tashi R P Agrawal tongti asütsü.