CBI Director inyaktsü atema Rishi Kumar Shukla shim

New Delhi, February 2 (Agencies): Madhya Pradesh cadre nungi 1983 batch IPS ketdangser Rishi Kumar Shukla Honibarnü Central Bureau of Investigation (CBI) nung Director inyaktsü shimogo.
Prime Minister Narendra Modi-i aniba selection committee kati nisung 30 nungi Rishi Kumar Shukla shimtet ta sorkar osang ka ajanga metetdaktsü.
“Cabinet indang Appointments Committee-i Central Bureau of Investigation (CBI) nung Director Alok Kumar Verma, IPS melena Rishi Kumar Shukla, IPS inyaktsü mulunga agizükogo. Pai mapa benzükba sülen nungi küm ana atema iba mapa inyaktsü” ta Department of Personnel and Training-i sangdong ka nung metetdaktsü.
Shukla ya tang Bhopal nung Madhya Pradesh Police Housing Corporation indang chairman teinyakdak lir. Pa tawa tu Madhya Pradesh Police nung Director General nungi police housing corporation-i mapa belena liasü.
CBI Director indang mapa ya January 10 nungi tazüng liasü. Alok Verma-i ajungbena iba mapa nungi anenba sülen mapa tazüng aküm. Verma ya Gujarat-cadre IPS ketdangser Rakesh Asthana den ochimashi ken o tem atema toktep.
PM-i aniba committee-i Verma CBI Director nungi anendaktsü aser Fire Services, Civil Defence and Home Guards nung Director General atema shim. Ajisüaka, Verma-i iba mapa tasenba magizük aser sorkar dangi shidi ka züluba nung pa July 31, 2017 nü arishi küm 60 junga superannuation tongogo anungji mapa inyaktsü temsüa mali ta ashi.
Alok Verma-i February 1, 2017 nungi tenzüka küm ana atema CBI Director inyaktsü tenzükba Brihostibarnü kümsük tembangogo. Verma anienba sülen nungi M Nageswara Rao-i interim CBI Director ama inyaka aru.
CBI Director shimba committee nung züngsemtemji PM Modi, Chief Justice Ranjan Gogoi aser opposition lennir Mallikarjun Kharge nungertem lir.
Taoba anogo ishika committee sasep nung obang meputep adokba ajanga CBI Director meshimteti aru aser yashi Hokolbarnü Supreme Court-i Centre sorkar dang CBI Director meshimba atema asüngdanga liasü.
Yashi Committee senden tanabuba amen saka idangjia züngsemtem tsüngda telemtetba ka magiteti tembang saka tanü sorkari Rishi Kumar Shukla shimba osang metetdaktsü.
Iba osang metetdaktsüba sülen ghonda ishika lir Congress lennir Mallikarjun Kharge-i Shukla shimba nung temulung masüba shidi ka züluogo.
Kharge-i PM Modi dangi züluba shidi nung Shukla-i ochimashiba ken o tem bushisüngdangba nung aika ajangshia mali ta shia lir, ajisüaka iba shidiji sorkari magizük.
Jitendra Singh, MoS PMO-i Kharge shidi atema ashiba agi “Kharge-i jembiba tiyazü aser kulitem mali, CBI Director shimtsüba asoshi inyakyim tajung lateta lir.”