CBI Director Rao anema benokba ken o SC-i angadangtsü

New Delhi, January 16 (Agencies): Central Bureau of Investigation (CBI) interim director, M Nageswara Rao shimba anema temepishiba ka benokba ken o taruba hopta Supreme Court (SC)-i angadangtsü.
Delhi nung aliba melungtet telok, Common Cause aser social activist Anjali Bhardwaj nati, January 10 nü tetuyuba ka ajanga taoba CBI Director Alok Verma mapatem Rao nem agutsübaji agientsü atema SC nung temepishiba ken o ka benok.
Kasa temepishiba ajanga CBI Director shimba maparen nung short-list asüba aser shimba inyakyim nung tashishitsü maliba kuli meshi.
Advocate Prashant Bhushan ajanga benokba ken o nungji, CBI interim director atema Rao shibaji ozüng alema lir, tejak repranga shim aser Delhi Special Police Establishment Act (DSPE Act) kübok ozüngtem alema inyak, ta shia lir.
DSPE Act ya Lokpal and Lokayuktas Act, 2013 ajanga yanglushiogo, aser ibaji ajanga CBI director kaji sorkari masü saka high powered selection committee kati shimtsü atema latetja lir. Iba committee nung züngsemtemji Ato kilonser, Opposition Lenir aser Chief Justice of India mesüra pai shimba Supreme Court nungi Judge ka asütsü.
Temepishiba ken o benokerisa ashiba agi, January 10 nü tetuyuba ajanga, Cabinet nungi Appointment Committee-i Nageshwar Rao shim ta shia lir.
October 23, 2018 nü tetuyuba ka ajanga Rao interim CBI Director shim, ajisüaka January 8 nü Supreme Court-i ibaji agientsü, kechiyong ibaji CBI Director shimba DSPE Act ozüng alema lir, ta shidi nungjisa shia lir.
“Ajisüaka sorkari mezüng aguja aliba tetuyuba agia Nageshwar Rao tanaben CBI interim Director shim; iba menden atema shimtsü asoshi sorkar dak tashi mali. DSPE Act kübok telatetbatem nung aliba ama aser high powered selection committee-i benokba nung ajemdaker shimtsüla,” ta shidi nung shia lir.
Selection Committee nung züngsem asemji- Ato kilonser, Narendra Modi, Justice AK Sikri aser Congress lenir aser Opposition lenir, Mallikarjun Kharge nunger lir, aser parnoki vote agutsütepa (Alok Verma agientsü atema Modi aser Sikri nati vote agutsü) 2-1 majority agi Alok Verma CBI director nungi agien.