CBI Director tangsa shimtsüla: SC

New Delhi, February 01 (Agencies): Tanü Supreme Court (SC)-i Centre dang kechiba CBI director meshimer, interim director dang shimbaji SC-i memelunger, ta ashi.
Justices- Arun Mishra aser Naveen Sinha nati akumba bench-i, CBI director mendenji kanga tongtibang, anungji tang tashi nungbo sorkari director ka shimmer alitsüla, ta ashi.
Sorkar tenüng nung Attorney General, K K Venugopal-i court dang, CBI Director tasen shimtsü atema Hokolbarnü Ato kilonser leniba nung high-powered committee senden amentsü, ta metetdakja liasü.
Paisa court dang, IPS officer, M Nageswara Rao interim CBI director shimtsü atema Centre-i high-powered committee dang nungi temelaba agia liasü, ta metetdaktsü.
AG-i, Hokolbarnü committee senden amentsü, ta metetdaktsüba nung ajemdaker SC-i kasa ken o ya February 6 nü angadangtsü lemteta ayu.
Rao interim CBI Director shimba anema NGO Common Cause-i temepishiba ken o ka benoka aliba angadangba mapang nung bench-i, tang tashi nungbo CBI director shimmer alitsüla, kechiyong taoba CBI January ita nungbo mapa nungi anisüngzüktsü ta meteter liasü, ta ashi. CBI Director shimtsü atema January 24 nü High-powered committee senden mena liasü, ajisüaka tatembang telemtetba ka dangi marutet.