CBI-i Anup Chetia puogo, 6 nü parnok ket nung ayutsü

New Delhi, November 12 (Agencies): Brihostibar nü CBI-i ULFA kiralongrar telok founder general secretary, Anup Chetia nisung tepsetba ken o nung puogo.
Sangdong tatsüka ajanga CBI-i, 1988 küm Assam sorkari CBI nem agütsüba nisung tepsetba ken o dak sentakba nung Chetia puogo, ta metetdaktsü.
“Pa yangi aliba okadaki anir aoba sülen okadaki pa anogo trok nü CBI ket nung agütsü,” ta CBI sangdong nung shia lir.
Golaghat nung taoba mapang Councilor, Deboksi Dhar Chaudhury tepsetba ken o CBI-i bushisüngdanger. 1986 küm August 29 nü ULFA züngsemtemi pa tepset aser pa tepsettsü sentong asameyangba nung Chetia densema lir ta tai tonglokja lir.
Arishi küm 48 Chetia ya 1997 küm Bangladesh nung apuba sülen bendanger sen aser satellite phone bena aliba ken o nung küm tenet tepouktaki yoka liasü.
Tepouktak ayuba mapang tembangba mapang nungi tenzüka India sorkari pa India-i anir arutsü küm 20 jungnüa Bangladesh dang mepishia aruogo.
Tesüiba küm 17 tashi pa Bangladesh yimtiba, Dhaka nung aliba jail nung puoka ayuba sülen yashi pa India-i anir aruogo.
Anup Chetia indang tenüng shitakbabo Golap Barua lir aser yashinep Bangladesh linüki India nunger ketdangsertem ket nung pa agüja liasü.