CBI-i Army ketdangser 5 anema ken o benok

New Delhi, January 03 (Agencies): Assam aser Arunachal Pradesh nung mapa lemzüka aliba sepaitem asoshi ration agütsür ka ket nungi sübokrem agiba atema CBI-i Army 5 anema ken o benokogo, ta Bodbarnü ketdangsertemi ashi.
Ration supply asüba nung ochimashi inyakba atema Central Bureau of Investigation (CBI)-i tawa tanaben atema army ketdangser anema FIR benokogo.
Tang tesüsaba benokba ken o nung CBI-i Colonel Raman Dahda, Lieutenant Colonel Mahendra Kumar, Subedar Devender Kumar, Havildar Abhay Singh, Subedar Sahuran Sahu aser supplier K K Yangfo nungeri tasa tamajung atongba ken o benok.
Dahda ya taoba 556 Army Supply Corps nung Commanding Officer aser Mahendra Kumar ya platoon commander inyaka liasü.
Assam aser Arunachal Pradesh nung mapa lemzüka aliba sepaitem asoshi fresh & dry rations alizükba dak sendakba nung parnoki civilian contractors nung sen lakh 18 tashi sübokrem meshia agi, ta CBI-i tai tongloktsür.
Army nungi ken o ka benokba sülen CBI-i iba mapa inyak.
Dahda-i pa tashi alia inyak aser supplier Yangfo ket nungi sen lakh 4.15 agizüka agi.
Ken o benokba nung shia aliba agi Mahender Kumar-i quality check mapa inyak saka pai ozüng alema mapa inyaka sen lakh 1 sübokrem meshia agi.
Yangfo ket nungi Subedar Devender Kumar-ia sen lakh 2.4, Havildar Abhay Kumar-i sen 98,000 aser Subedar Sahuran Saho lakh 7.65 sübokrem meshizüka agi.
Yangfo ya Arunachal Pradesh kübok Tawang nung civilian contractor ka lir aser pai 2015 aser 2017 tsüngda Army atema ration supply asü.
CBI-i mezüng bushisüngdanga aodang Yangfo-i ration supply asüba nung ketdangsertem aser unit nung inyakertemi ozüng alema mapa inyakba putet.
CBI-isa Army Service Corps nung ketdangsertem- Lt Col Amit Sharma aser Lt Col Sutikshan Rana nati 2012 aser 2016 tsüngda Nagaland nung ration supplier ka ket nungi sen lakh 82 sübokrem meshia agiba atema tai tongloktsü.