New Delhi, September 26 (Agencies): Honibar nü Central Bureau of Investigation (CBI)-i Himachal Pradesh chief minister, Virbhadra Singh’er jala kibong akümba anogo nung pa anema ken o ka benokogo, aser pei dak mapet ali rongsen bendenba aser kiojen aliba ken o nung Delhi aser Himachal nung aliba par ki ana densema tesem 11 mita reprangogo.
CBI-i Singh aser pa kinüngtsü Pratibha Singh, par jabaso Vikramaditya Singh, par jala Aparajita Singh aser pa atema inyaktsür LIC agent Anand Chauhan nunger parnok dak mapet rongsen aliba ken o bushisüngdangtsü atema bushisüngdanga liasü, aser tanü pa anema ken o benokogo.
CBI-i, Singh 2009 nungi 2011 küm Union steel minister inyakba mapang par kibongi ochimashiba lenmang nungi sen aser osettsüset sen crore 6.1 jenjang bendenogo, ta tai tongloktsür.
Ketdangsertemi ashiba agi, Singh union steel minister inyakba mapang LIC agent Anand Chauhan ajanga pa tenüng nung LIC policy tem ajanga tim masüba lenmang nungi rongsen jenti benden.
October 2013 nungi CBI-i Singh anema süpokrem agiba ken o tem bushisüngdanger aser 2014 küm iba ken o dang sentakba nung pa danga asüngdangyaogo.
You must be logged in to post a comment Login