CBI-i Ibobi Singh den nisung kar ki mita ao

New Delhi, November 22 (Agencies): Hokolbarnü Central Bureau of Investigation (CBI)-i Manipur, Mizoram aser Haryana kübok tesem 9 mita ao.
Sorkar sen tim mesüi amshiba ken o tem nung ajemdaker CBI-i Aizawl, Imphal aser Gurgaon nung tesem 9 mita aoer, ta ketdangser kati ashi.
CBI-i taoba Manipur chief minister O. Ibobi Singh, taoba MDS project director Y. Ningthem Singh, taoba MDS chairman DS Poonia, (Retd), P.C. Lawmuknga, (Retd), taoba MDS chairman O. Nabakishore Singh aser administrative officer, MDS (Retd), S. Ranjit Singh aser tangartem anema ken o benok.
O. Ibobi Singh ya Manipur Development Society (MDS) nung chairman inyaka liasü.
Tai tonglokja alirtem ya June 30, 2006 nungi July 2017 tashi Manipur Development Society nung inyakdang sorkar sen Rs 332 crore tashi tim mesüi amshi, ta CBI-i tai tongloktsür.
Manipur Development Society nem Rs 518 crore agütsüba nungi parnoki senji tim mesüi amshi, ta parnokisa ashi.
Tanü CBI-i O Ibobi Singh’er ki mita reprangdang Rs 11.47 lakh aser demonetised currency Rs 26.49 lakh ngutet ta osang metetdaktsü.
Sen tejen ayubaji ozüng alema inyakba mapa ka lir aser sen anguba dang nungi punguben agi teimba senchi achitsü akok, ta CBI-i ashi.
Ibobi Singh’er kidangsa Audi, Mitsubishi, Honda aser Hyundai dena gari 8 tashi ngutet, ta CBI-isa metetdaktsü.
CBI-isa Ningthem Singh’er kidang sen tejen lakh 10 angu aser Imphal nung ki tulu ana indang kulikakettem ngutet, ta osang ajanga ashi.
CBI-isa Poonia, Lawmkunga aser Nabakishore nunger kidang rongsen aser bank documents ngutetogo, ta parnokisa shisem.
CBI-i bushisüngdangba pelashishia agizüker aser yariteptsü ta Ibobi-i tanü metetdaktsü. “Ni, bushisüngdang pelashishia agizüker. Parnoki ni aibelenogo ta bilemer saka ibaji bushisüngdang tembangba sülen ang kuli agütsütsü” ta New Delhi nung Ibobi-i osangbener dang ashi.
“CBI dang masü ED mesüra NIA teloktema pelashishia agizüker aser ni parnok den yariteptsü” ta paisa shisem.