CBI-i Kolkata Police Commissioner aser taoba MP dang asüngdangya

Shillong, February 10 (Agencies): Deobarnü Shillong nung CBI-i Kolkata Police Commissioner Rajeev Kumar aser taoba TMC MP Kunal Ghosh na dang Saradha chit fund ochimashi mapa atema asüngdangya asü.
Supreme Court-i CBI dang Shillong nung Kumar dang asüngdangya asütsü tuyuba ama tanü agi anogo anabuba pa dang asüngdangyaogo.
Honibarnü Shillong nung CBI ketdangser asemi Kolkata Police commissioner dang ghonda 9 jungnüa asüngdangya asü.
Saradha ken o ya CBI ket nung magütsüdang West Bengal Chief Minister Mamata Banerjee-i iba ken o bushisüngdangtsü atema tentetba special investigation team (SIT) ji Kumar lenisüba kübok liasü.
Taoba MP Ghosh tanep 10:00 ako meta Shillong tonga aru aser pai CBI office anasa pandal nung goddess Saraswati dang nungi temoatsü meshiba sülen CBI office telungi ai.
“Ni ashitsü kecha mali. Iba office nung arua osang agiba angadangang ta kü dang ashi. Ni CBI-i ashiba angaa aruogo aser iba jagi tanü ni yangi aru” ta Ghosh-i osangbener dang ahsi.
Taoba Trinamool Congress MP ya 2013 küm Saradha ponzi ken o atema tai tonglokja apu aser 2016 nungi pa bail nung chioka lir.
Ghosh-i iba ken o nung BJP lennir Mukul Roy dak tai tonglokja lir. Roy ya mapang ka Banerjee den tesentaktep tajung aliba nisung ka liasü.
SC-i ashishitep madoktsü atema Shillong nung Rajeev Kumar dang asüngdangya asütsü tetuyuba agütsü.
February 3, 2019 nü CBI-i Kolkata nung Kumar dang asüngdangya asütsü atema par kidangi ao saka idangji Kolkata Police-i parnok noktang. Iba ajanga CBI-i Supreme Court nung ken o benok.
Iba tatalokba sülen West Bengal chief minister Mamata Banerjee-i anogo asemnü ‘Save the Constitution’ ta ser mener lungkak aitba sentong ka agi.
Mamata-i Prime Minister Narendra Modi aser BJP national president Amit Shah dak tai tongloktsü.
Rajeev Kumar-i SIT nung züngsem ka inyakdang pai Saradha dak sendakba kulikaket tongtipang kar nguteta lir aser iba atema pa dang asüngdangyar, ta CBI-i ashi.