CBI-i Prannoy Roy’er kiojentem mita aoba aitsür

New Delhi, June 6 (Agencies): CBI-i NDTV network indang co-founder Prannoy Roy’er kiojentem mita aoba ajanga Emergency anogotem bilemteter, ta Mongulbarnü Kerala chief minister Pinarayi Vijayan-i ashi.
CBI-i Prannoy Roy aser pa kinungtsü Radhika Roy na kiojentem mita aobaji Narendra Modi’er sorkar indang tasa ka lir. Centre anema jembirtem aser nokdakertem ola nembangtsütsü atema iba mapa inyaker, ta Vijayan-i ashi.
“Centre sorkari ozüng amertem aser CBI amshia mang ayangtsü meranger aser iba inyakyim ajanga ni Emergency anogotem bilemteter. Iba ya media ola nembangtsü inyakyim ka lir aser nisung ajaki iba mapa anema ola adoktsüla” ta paisa metetdaktsü.
Hombarnü CBI-i Delhi aser Mussoorie nung Roy’er kiojentem mita ao. Parnoki bank nung sen apuba meyipa magütsüba atema iba ta inyak ta CBI-i ashir.
Prannoy kinungtsü Radhika Roy ya CPM politburo member Brinda Karat tenu lir.
Mongulbarnü Press Club of India-ia iba mapa atema tebilemtsü abenba metetdaktsüogo aser media amokbangtsü mesüra azüoktsü merangba inyakyim ajak khukhua aitsür, ta parnokisa ashi.
“CBI-i NDTV kiojentem mita aoba atema onoki süoki ia bilemer” ta PCI tir Gautam Lahiri-i ashi.
Ano, Kashmir Editors Guild (KEG)-ia iba inyakyim aitsüba osang metetdaktsüogo.
Prannoy Roy’er kiojentem mita aobaji media nembangtsütsü merangba inyakyim ka lir aser iba ya ajanga yimjak nung memetetdaktsüi emergency maparen inyakba ka ama lir, ta KEG-i sangdong ka nung ashi.