CBI-i RSS züngsem tepset ta temulung malem bilemsang CPI-M lenir pua lir

New Delhi, March 8 (Agencies): Rashtriya Swayamsevak Sangh (RSS) züngsem Kathiroor Manoj tepset ta tai tonglokja alisang CPI-M lenir, P. Jayarajan pua asemnü asüngdangyatsü asoshi New Delhi court ka ajanga CBI nem temelaba agütsüogo.
Bodhbarnü nungi tenzüka Central Bureau of Investigation (CBI)-i Jayarajan dang asüngdangyaba mapang nüngdakba ajak tiptema renema atatsü asoshi Kannur jail superintendent nem Thalassery principal sessions court-i tetuyuba agütsüogo.
Jayarajan ya dang temulungjang tashidak agi kangshia Kozhikode nung aliba mozi ki ka nung yaridar.
Jayarajan-i District sessions court matsüngdangi pa sasa arua pudaktsüba sülen February 12 nü nungi tenzüka ita ka atema Thalassery court tetuyuba nung pa pua ayu.
Jayarajan-i pa sasa pudaktsüi aruba mapa nungsa Kannur jail nung puoka ayu. Ajisüaka pa temang nung timtem aliba ajanga Kannur jail anasa aliba mozü ki kati anir oa anepalu aser iba sülen Kozhikode Medical College hospital-i anir ao.
CBI-i pa dang asüngdangyatsü asoshi February 17 nü nungi court temelaba ata liasü.
Jayarajan ya tesüiba mapang Kannur district Communist Party of India-Marxist (CPI-M) nung Tongti Tezülur liasü.
Pa ya RSS züngsem Manoj tepsetba ken o nung Section 18 of the Unlawful Activities (Prevention) Act (UAPA) kübok CBI-i aija lir.
CBI-i ashiba agi, Jayarajan ya Manoj tepseter nisung 25 buba lir aser iba tepsetba maparen nung pa tongti lir.
RSS nung District functionary, arishi küm 42 tain, asür Manoj ya Kerala nung Kannur district kübok Kathiroor nung September 1, 2014 nü rangset, ta CPI-M züngsemtemi metetdaktsü.