CBI-i state 19 nung tesem 110 mita ao

New Delhi, Chiteni/July 09 (Agencies): India linük tesem ajungalen operation oa Central Bureau of Investigation (CBI)-i ochimashi, prangpong shibelenba aser ozüng alema inyakba ken otem dak sendakba nung state 19 nung tesem 110 mita ogo, ta Mongolbarnü ketdangsertem osang ka ajanga metetdaktsü.
Central Bureau of Investigation (CBI)-i linük nung tesem 110 tashi mita aoba sülen ken o tasen 30 benokogo, ta ketdangsertemisa metetdaktsü.
CBI-i Delhi, Mumbai, Chandigarh, Jammu, Srinagar, Pune, Jaipur, Goa, Raipur, Hyderabad, Madurai, Kolkata, Rourkela, Ranchi, Bokaro, Lucknow aser Kanpur yimtitem nung tesem balala mita ao aser Uttar Pradesh, Uttarakhand, Odisha, Himachal Pradesh, Punjab, Haryana, Andhra Pradesh, Karnataka aser Bihar state tem nunga tesem balala mita ogo.
Iba operation metembang tashibo mita aoba osang aser ken otem osang tejangja mesangdongtsü, ta ketdangsertemi ashi.
Tan hopta tsüngda CBI-i tang agi anabenbuba operation aor. Taoba Mongolbarnüa banking tsütsü ashioktsüba ken o dak sendakba nung CBI-i tesem 50 mita oa liasü.
Bank dak sendakba nung sen crore 1,134.54 takoksa anguba nung ajemdaker CBI-i Delhi, Mumbai, Ludhiana, Thane, Gaya, Gurgaon aser Chandigarh yimtitem nung tesem balala mita ao. Parnokisa Bhopal, Surat, Valsad, Pune, Palani aser Kolar nunga tesem balala mita oa liasü.
Banking tsütsü mita aoba sülen CBI-i ken o tasen 14 benokogo.