CBI-i süpokrem agir MHA ketdangser ka apu

New Delhi, May 15 (Agencies): Foreign Contribution Regulation Act (FCRA) kübok NGOs nem aritepa notice agütsüba aser office file tim mesüi amshiba nung tai tonglokja alisang, Ministry of Home Affairs Under Secretary, Anand Joshi tanü CBI-i puogo.
CBI ketdangsertemi pa apuba osang tejangja agütsütsü memulungi liasü, ajisüaka asüngdangyatsü atema pa CBI headquarters-i anir ogo, ta osang ka ajanga ashi.
FCRA ozüng alema inyakba dak sentakba nung Teesta Setalvad indang NGO Sabrang Trust indang licence agientsü atema MHA-i iba Trust nem tetuyuba ka agütsü, aser Joshi-i file tem agien ta tai tonglokja lir.
May 11 nü Joshi-i pa kinungtsü dang shidi ka ajanga, chirnurtem anepaluang ta ashiba den külemi tesüiba ita ishika pa dang temaba jenjang nung inyaker kati (Additional Secy. BK Prasad) pa amokmerener, ta shir kidang nungi ao.
“Tensa mejungi kümogo, ibayongji ni iba shidi zülur. Ni tesünep nüngdaker, aser ibaji yangibo tamakoktsü ka lir. Ni ki toktsür aoer aser yimlibilema ni tebushi. Tangbo asen chirnur atema tebu-a na aser tetsü-a kümogo. Kü linük tenzükdang iba ama ya ataloktsü ta ni kodanga mebilem,” ta shidi nungji shia lir.
Joshi kinungtsü Meenakshi-i ashiba agi, pai süpokrem agitsü memulungba ajanga pa dang temaba jenjang nung inyakertemi pa nem tai tongloktsütsü meranger.
“Kü kinungbuji ochishir ka, pa den külemi inyakertem dang ibaji asüngdangang. File ji lapokdangang aser nenoki atangji ji metettsü. Pa kanga jashia liasü. Pa dak langka danga atalokra ibaji BK Prasad indang khuret asütsü. Ni Prasad nem temerenshi agütsüdaktsüner,” ta Joshi kinüngtsüi ashi.
Joshi’er ki aser office mita reprangba sülen Indian Penal Code, section 120-B aser prevention of corruption act kübok CBI-i pa anema ken o ka benokogo.
“Ketdangser ki mita aodang onoki sen lakh 7.5 nguogo aser tashishitsü aketba kaket kar nguogo, item rongnung MHA aser I&B Ministry indang file densema lir,” ta CBI-i ashi.