CBI-i süpokrem agir Mumbai Income Tax ketdangser ka apu

New Delhi, Dec. 11 (Agencies): Mumbai nung Income Tax department Joint Commissioner-i construction company kibur ka dang nungi saru timtem ka bentettsü atema süpokrem sen lakh 5 agiba atema Hokolbar nü puogo, ta CBI-i ashi.
Central Bureau of Investigation (CBI)-i S.K. Jhangre Mumbai nung aliba pa indang office nung apu, ta CBI ketdangser kati ashi.
Kharge-i company indang Income Tax assessment kakettemji reprangshitsü ta amokmerenba atema pa anema onük ka agütsüba sülen CBI-i ken o ka benoka liasü.
“Joint Commissioner-isa onük benoksang indang CA (chartered accountant)-a amokmerenogo, aser pai Income Tax bentettsü atema kibur (company kibur) arua pa ajurutsüla ta shia liasü,” ta CBI kedangserisa ashi.
Ketdangseri ashiba agi, Joint Commissioner jagi iba tebilemtsü bentettsü atema sen lakh 30 süpokrem meshia liasü.
“Süpokrem senji sen lakh 25 tashi alu aser tai tonglokja alisang jagi Mumbai nung aliba Piramal Chambers nung pa indang office nung mezüng shilem (instalment) atema sen lakh 5 agitsü mulung,” ta CBI ketdangseri ashi.
Onük benoksang ket nungi Joint Commissioner-i süpokrem sen lakh 5 meshizükba mapang pa apu, ta paisa ashi.
CBI-i Joint Commissioner’er ki aser office mita reprangba mapang hon agi yangluba senti osettem, gold coins seret 1.5 aser tashishitsü aketba tezüluba kar angu.