CBI-i Syndicate Bank nung auyartem indang kuli agütsüogo

New Delhi, October 8 (Agencies): Central Bureau of Investigation (CBI)-i 2014 küm Syndicate Bank nung auyaba dak sentakba indang kuli (charge sheet) agütsüba nung Syndicate Bank chairman-cum-managing director S.K. Jain aser Bhushan Steel Ltd. nung vice-chairman Neeraj Singhal nata densema lir, ta osang ka ajanga Brihostibar nü metetdaktsüogo.
Iba kuli ya Special Judge Gurdeep Singh lia file asü aser pai iba ken o October 12 nü tashi thinena bener ao kechiba süra CBI-i ano kuli kar bendenloktsü asoshi mapa tatsüka nüngdaka liasü.
CBI-i Hombar nü agütsüba kuli nung Jain, Singhal, Vineet Godha, Puneet Godha, Vijay Pahuja aser Pankaj Kumar Tiwari nunger iba auyaba nung dena lir ta shia lir.
Parnok trok prongla ya Indian Penal Code (IPC) arrla balala kübok aija lir.
Aji oda süaka CBI-i mezüng aija aliba nisung ana, Purushottam Lal Totlani aser Arun Agarwal na dakbo kecha tai meputet ta kasa kuli nung shia lir.
CBI-i ashiba agi, Jain-i bank temzüng dak alema ‘credit limit’ ajungkettsütsü asoshi kar dang nungi süpokrem sen lakh 50 agiogo.
CBI-i, aija alirtem indang kuli tejangja bendena lir anungji parnok obendangdaki jaoka jembiang, ta court dang shiogo.
Iba dak sentakba nung tenük kuli angur nisung 80 tashi lir, ta CBI-isa ashi.
Aija alirtem ajak tang bail nung adoka lir.