CBI-i Tripura minister Bijita Nath dang ken o ashishi

Agartala, June 29 (Agencies): Central Bureau of Investigation (CBI) ketdangsertemi Brehostibarnü ‘Rose Valley chit fund scam’ dak sendakba nung Tripura Social Welfare Minister Bijita Nath dang ken o ashishiogo.
Additional Superintendent of Police S K Tripathi aser Inspector Bratin Ghoshal nati minister official chamber nung la dang ghonda ka shi keno balala ashishia liasü.
Ketdangsertemi keno ashishiba indang osang kecha magütsü. Maneni minister-ia iba ken o dak sendakba nung kecha telangzüba magütsü, ta osang ajanga metetdaktsü.
“Nai Rose Valley Limited mendenbuba anema ken o benokba, case number 39(S)/2014 jangjaa alitsü ta reprangteter aser na June 29 nü ken o ashishiteptsü asoshi jaoker,” ta CBI-i osang agütsü.
Tripura nung minister tem rongnungi CBI-i puri ken o ashishitsü asoshi osang agütsüba rongnung iba ya mezüngbuba lir.
Osang ajanga ashiba agi, ‘Rose Valley chit fund scam’ nung Nath densema lir, saka lai iba osangji aitsüogo.
Bodhbarnü opposition party temi Chief Minister Manik Sarkar mapa nungi anentsü asoshi khangogo.
Trinamool Congress (TMC) lenir aser opposition party lenir Sudip Roy Burman-i state nung chit fund scam dak sendakba nung chief minister mapa nungi anentsüla ta khanga liasü.