CBI interim director Rao shimba anema SC nung temepishiba benok

New Delhi, January 14 (Agencies): Central Bureau of Investigation (CBI) nung interim Director atema M Nageswara Rao shimba anema Delhi nung amenoka aliba melungtet telok ka tenüng agi, Common Cause-i Supreme Court (SC) nung temepishiba ka benokogo, ta osang ka ajanga metetdaktsü.
Melungtet telok jagi senior advocate Prashant Bhushan ajanga SC ajuru.
Alok Verma CBI Director menden nungi agienba sülen ghonda ishika tsüngda CBI Additional Director, M Nageshwar Rao interim director shim. CBI Director tasen ka meshim tashi Rao-i CBI Director mapa inyaka atatsü.
CBI Director mapa agizükli Rao-i taoba CBI Director Verma-i transfer telemtetba agia aliba ajak pai agientsü aser January 8 nü ketdangsertem nem tanaben kasa menden agutsü.
New Delhi nung Ato kilonser, Narendra Modi-i aniba Selection Committee ghonda ana senden amenba sülen Verma CBI Director menden nungi agien. Selection committee nung züngsem anaji Congress Party lenir aser Lok Sabha nung opposition lenir, Mallikarjun Kharge aser Supreme Court judge, AK Sikri na lir. Par asem tsüngda vote agitepa 2-1 majority agi Verma Director menden nungi agien.
Rao ya 1986-batch Odisha cadre IPS officer ka lir. Verma aser CBI Special Director Rakesh Asthana na tsüngda mapang talangka tai tongloktsütepa aruba ajanga Centre sokrari tena nem leave agutsü aser October 23, 2018 aonung tesü sorkari Rao CBI director shima liasü.
Tasüngnepji Rao-i transfers orders aika agutsü, aser item ketdangsertem rongnung Asthana anema bushisüngdanger DSP, A K Bassi, DIG M K Sinha aser Joint Director, A K Sharma nunger densema liasü.