CBI ketdangsertem mangatettep nung PM tebang ayir

New Delhi, Mongputeni (October) 22 (Agencies): Special Director Rakesh Asthana aser tangartemi süpokrem agi ta tai tongloktsüba dak sendakba nung Hombarnü CBI-i Deputy Superintendent of Police Devender Kumar apu.
CBI Director Alok Verma aser pa deputy Rakesh Asthana tsüngda obang meputep adoka raratepba mapang ka nung Prime Minister Narendra Modi-i osang jangjatsü atema tenaprong jaokogo.
“Prime Minister-i osang tejangja metetnür” ta PMO ketdangser kati ashi.
Moin Qureshi ken o atema Hyderabad nung amenoka aliba shishilembar Sathish Sana-i osang tiyazü ashi ta CBI-i tai tongloktsür aser iba nung ajemdaker parnoki tanü Deputy Superintendent of Police Devender Kumar apu.
Iba ken o nung Devender Kumar ya investigating officer lir.
Tawa Sana-i ken o benokba nung ajemdaker CBI-i Rakesh Asthana aser Deputy SP dena tangartem anema FIR ka benok.
Sana-i September 26 nü Delhi nung lia osang sangoktsü ta shia lir saka iba anogo pa Hyderabad nung liasü ta CBI-i ashir.
“Taküm August ita Special Director-i Central Vigilance Commission dang CBI Director anema osang sangoktsüba sülen o melenshiba lir” ta CBI-isa metetdaktsü.
Moin Qureshi ken o bushisüngdangba nung October 1 nü Sana aden aser pai October 3 nü osang sangoktsü, ta parnokisa shisem.